Scherpenheuvel a resultá e ekipo kampion di Kampionato Hubenil kategoria U-20, derotando e ekipo di Centro Dominguito ku e skor di 2-0!

Scherpenheuvel a resultá e ekipo kampion di Kampionato Hubenil kategoria U-20, derotando e ekipo di Centro Dominguito ku e skor di 2-0!
E Gran Final aki a tuma lugá ayera 7’or pm na tereno di FFK!

Ayera, 15 di yüli 8’or di anochi na tereno di FFK dilanti un públiko grandi, e ekipo di Scherpenheuvel a titulá nan mes komo e ekipo kampion di Kampionato Hubenil kategoria U-20. Esaki despues ku nan a sa di gana e ekipo di Centro Dominguito ku e skor di 2-0 ku golnan di Jonathan Libania i Igmar Kleinmoedig.

Kampionato Hubenil kategoria U-20 a inisiá dia 7 di yanüari último ku un total di 13 ekipo partisipando. Tur wikènt e ekiponan aki tabata hunga kontra otro na diferente tereno rònt Kòrsou. Despues di e promé buèlta, e 8 ekiponan ku e mihó puntuashon a klasifiká pa e play-off. E último 2 ekiponan ku a keda, a bataya ayera durante e Gran Final aki di kua Scherpenheuvel a resultá esun ku a sali viktorioso.

Komishon Hubenil i FFK ta felisitá ámbos ekipo pa e tremendo partido di ayera, spesialmente e ekipo di Scherpenheuvel ku e resultá e ekipo kampion di Kampionato Hubenil. E otro kategoria di nos kampionato ta ku vakashon i den luna di ougùstùs e partidonan aki tambe lo kontinuá rumbo pa e gran final di Kampionato Hubenil 2016-2017.