Gobièrnu no ta duna atenshon na nos kareteranan, plenchi i parkenan, aseranan kaminda peatonnan tin ku kana ta shushi i peatonnan mester hasi uzo di kaminda públiko ora nan ta trafiká na pia

Gobièrnu no ta duna atenshon na nos kareteranan, plenchi i parkenan, aseranan kaminda peatonnan tin ku kana ta shushi i peatonnan mester hasi uzo di kaminda públiko ora nan ta trafiká na pia

 

Kòrsou, 19 aprel 2018

 

Pa hopi tempu kaba no tin e atenshon pa kareteranan manera debe ser. Nos kareteranan ta den mal estado i no papia mes di mantenshon di nos barionan pa loke ta trata flora i founa i tambe nos aseranan, plenchi i parkenan. Pa loke ta trata kareteranan den mal estado nos lo bini bek riba esaki separadamente.

Ya pa hopi aña abitantenan ta keha ku nan rason ku ta praktikamente imposibel pa nan kana i tambe rekreá den nan bario debí ku ramanan, palunan a krese di tal manera ku ta difísil pa nan por kana den nan bario.

Mi no ke ni menshoná e peliger ku esaki ta trese kuné pa ku tráfiko motorisá, na momentu ku peatonnan tin ku hasi uso di karetera debí ku ramanan, palunan a krese ku ta pone ku e peaton no tin espasio pa kana riba asera ku tur e konsekuensianan ku esaki por trese kuné.

Na momento ku dos vehíkulo di motor topa otro, ta praktikamente imposibel pa nan pasa banda di otro. Si esei logra e ta trese kuné ku nan ta raspa nan vehíkulo di mal forma. Ta bon pa nos bai bek den pasado kon tabata hasi mantenshon di kareteranan. E kompania Selikor N.V. tabata risibí supsidio di parti di Gobièrnu i Selikor na su turno tabata sòru pa kada bario un biaha pa aña wòrdu limpia debidamente. Selikor tabata pone hopi énfasis riba shushinan manera plèstik, bòter, kùp ku ta wòrdu tira riba kaya i tambe ramanan ku ta krese riba kaminda ku ta stroba tantu peaton komo outo i baiskel pa trafiká.

E trabounan ei tabata kontribuí tambe na nos ekonomia, paso hopi hende ku tabata na kas sin trabou tabata haña trabou serka e kompanianan chikí ku ta enkargá ku e trabounan di limpiesa i nan tabata keda kontentu ku un entrada pa kria nan famia.

Despues a start diskushonnan serka Ministernan di Salubridat Medio Ambiente i Naturalesa di turno i tambe Ministernan enkargá ku Tráfiko Transporte i Planifikashon Urbano ken ta responsabel pa mantenshon di nos kareteranan i barionan. Te ku awe e diskushon ei tei i nada no ta pasando den nos barionan.

Abitantenan, outomobilistanan no ta interesá den e diskushon ei, nan kier pa nan bario haña e atenshon debido i remediá e situashon aki di forma inmediato, debí ku ta p’esei nan ta paga diferente impuesto haltu, sigur esun pa nan outo i su plachi number por mobilisá riba nos kareteranan.

Na minister enkargá ku Salubridat Medio Ambiente i Naturalesa i tambe Minister enkargá ku Tráfiko Transporte i Planifikashon Urbano, na nòmber di Pueblo di Kòrsou mi ta hasi un apelashon riba bosnan pa sali bisa ki dia trabounan di limpiesa ta start den e barionan di Kòrsou.

Si ta papia ku Hende ta Sentral bosnan tin ku demostrá esaki den praktiká tambe.

Na nòmber di frakshon di MFK,

Gilmar “Pik” Pisas

Miembro di Parlamento pa MFK