Prome Minister Evelyn Wever-Croes: IMF TIN CONFIANSA DEN ARUBA Segun evaluacion di IMF Economia diAruba ta crece mas

Prome Minister Evelyn Wever-Croes:

IMF TIN CONFIANSA DEN ARUBA

Segun evaluacion di IMF Economia diAruba ta crece mas

 

Durante conferencia di prensa di Gobierno di Aruba dialuna mainta, Prome Minister Evelyn Wever-Croes, hunto cu demas minister di Gabinete Wever-Croes, a anuncia e bon noticia cu e evaluacion di IMF pa loke ta trata nos situacion financiero y economico ta positivo.

Cada 2 aña IMF ta haci un evaluacion di nos situacion financiero y economico, un asina yama Article 4 Mission. E ultimo dos simannan IMF tabata na Aruba y a hiba conversacion cu tur sector: publico, priva, NGO’s, Gobierno y oposicion.

Dialuna mainta, IMF a publica e ‘Concluding Statement’ di nan bishita, y e ta hopi positivo pa Aruba. Si nos compara cu e mesun ‘Concluding Statement’ di dos aña pasa, esta 2017 na unda IMF ta conclui pa ambos aña: “2017: growth is weak” vs “2019: outlook is broadly positive”.

Pa 2019, IMF ta premira un crecemento economico di 0.7% real, cu ta ekivalente na 2.4% nominal, siendo cu den presupuesto nos a tene cuenta cu crecemento di 1% so nominal. Cu esaki IMF ta mustra cu nan tin confiansa cu nos economia lo crece mas cu nos a tene cuenta cu ne. Y esaki ta locual nan ta yama “baseline”, pues sin cu nos tene cuenta cu otro esfuersonan manera e vision economico di e 6 sectornan prometedor manera Minister di Asuntonan Economico y Finansa, Xiomara Ruiz-Maduro ta trahando riba dje.

Pa añanan despues di 2019, nan ta premira un crecemento economico real di 1.1%, cu ta ekivalente na 3% nominal, cu tambe ta mas halto cu locual nos a tene cuenta cu ne den e proyeccionnan di mas aña.

Conclusion: IMF tin confiansa den nos economia, cu ta recuperando poco poco pero sigur.

Riba e Plan financiero economico pa pone nos finansas publico bek den e bon rumbo, tambe IMF ta positivo.

Riba e reforma fiscal tambe nan a duna comentario positivo.

IMF a constata cu inflacion aña pasa a yega3.6%, cual tabata debi na prijs di crudo cu a subi, y na e crisistax cu a wordo introduci aña pasa. Mes momento IMF ta proyecta cu inflacion lo baha e aña aki na 1.7%

E riesgo mas grandi ta e situacion naVenezuela, maske nan ta conclui cu Aruba a maneha pa absorbe e crisis door di tuma pasonan serio pa laga e situacion na Venezuela no afecta nos. por ehempel pa importa fruta y berdura, nos a haya otro ruta. E turismo cu no ta bin mas di Venezuela, ta bin for di otro lugarnan.

Den corto IMF a conclui y a recomenda:

– E reforma fiscal y e pasonan pa sanea e situacion financiero ta hopi positivo, y ta pidi atencion tambe pa gastonan di salario den Gobierno, y gastonan di AZV.

– E maneho economico y e 6 sectornan prometedor ta mehora e evaluacion pa Aruba, den nan diversificacion di tursimo, agricultura, etc. y IMF ta hopi satisfecho cu Gobierno tin plannan pa mehora ‘ease of doing business’.

– Turismo ta creciendo, y mester diversifica. Nan ta recomenda pa Aruba sigui concentra riba brinda calidad halto di servicio

– Inversionnan den infrastructura ta positivo

– Siguridad y nos sistema legal ta sigui ta factornan importante pa atrae inversionista

– Tene cuenta cu aspectonan social

– Percura pa enseñansa ta alinea cu e necesidadnan riba mercado laboral, pa prepara hobennan   cu ‘vocational training’, y brinda miho proteccion na e trahado

– IMF ta encurasha nos Gobierno pa continua cu e plannan pa combati corupcion

– IMF ta positivo riba e progeso cu a wordo haci pa cu data y estadistica a traves di e cuentanan nacional

“IMF ta hopi agradecido pa e cooperacion cu e la haya di Gobierno. Y di mi banda mi ta gradici tur esnan cu a duna nan cooperacion na IMF, tanto sector publico, sector priva, NGO’s, oposicion, especialmente BancoCentral, Minister di Finansa y tur colega minister.

Nos no ta ainda caminda nos mester ta, pero  nos ta riba e bon caminda. E evaluacion positivo di IMF, hunto cu e proyeccionnan positivo cu IMF ta haci, ta muestra di confiansa cu poco poco pero sigur nos ta ganando bek den nos pais.

Un cos ta sigur, nos no por bay bek. Nos no por permiti nos pais cay bek den mannan di esnan cu nunca a interesa pa mehora Aruba su posicion financiero, cu a scoge pa endeuda e pais aki, cu en bes di busca inversionnan, a fia placa pa hinca den nos economia. Tempo mes a demostra nos cu e vision ey no solamente a fracasa, sino a causa nos pais hopi daño. Un daño cu lo tarda mas di 20 anja pa nosrecupera di dje. Apenas na 2039 nos debenacional lo ta bek banda di 50%, cu e ta poco mas cu e tabata na 2009 prome cu e cambio di gobierno anterior.

Imagina bo si gobierno anterior no a redobla nos debe? P’ esey nos mester percura pa nunca mas Aruba haya gobernantenan asina iresponsabel.

No ta facil, pero den union nos lo enfrenta e retonan nos dilanti, y nos lo saca nos pais padilanti. Cu vision y determinacion nos lo crea progreso y bienestar pa tur ciudadano di nos pais”, Prome Minister Evelyn Wever-Croes a expresa.

IMF

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: