“Tur dia Control di Prijs di Supermercadonan ta sigui pa garantisa producto di bon prijs y calidad na nos pueblo”

“Tur dia Control di Prijs di Supermercadonan ta sigui pa garantisa producto di bon prijs y calidad na nos pueblo”

ORANJESTAD – Departamento di Asuntonan Economico, Comercio y Industria (DAECI) ta informa riba e trabaonan cu seccion di prijs ta implementa regularmente pa cu control di supermercadonan.

Controladornan di  Departamento di Asuntonan Economico ta eherce control diariamente den supermercadonan pa cu prijsnan maximo di productonan di e canasta basico, observacion di prijs di productonan no regula pa e macuto di compras y tambe pa indicacion di prijs di productonan.

E siguiente productonan ta pertenece na e canasta basico actual pa cual tin prijs maximo stipula pa Gobierno: Aros, hariña di maishi, té, koffie, lechi pa baby, azeta pa cushina, lechi en polvo, lechi liquido pa koffie, boonchi cora seco, boonchi lima seco, boonchi preto seco, salmon den awa den bleki, sardin den awa den bleki, tunafish chunk/flaked/grated den awa den bleki, spinashi frozen, mixed vegetables frozen y broccoli frozen.

Diariamente controladornan di DEZHI ta sali riba caya y ta haci nan control. Awe control a ser hiba na diferente supermercado na Noord manera He’s Supermarket, Wa Fa Supermarket, como tambe a haci control na supermercadonan den region di playa manera  

Teng Sing Supermarket, NG Supermarket y Hua Run Supermarket.

Durante e control e controladornan ta check prijs di tur producto cu ta pertenece na e canasta basico y den caso di incumplimento cu e prijs maximo stipula, ta avisa doño di supermercado pa haci cambio. Den caso di iregularidad repetidamente, controladornan  lo tuma pasonan necesario. E trabao di control ta reglá di un manera cu tur supermercado ta wordo controla por lo menos un biaha pa luna.

E lista completo di productonan di canasta basico cu nan prijs maximo vigente ta disponibel riba e website www.deaci.aw y tambe riba e App ‘Control di prijs’. E lista aki ta wordo adapta cada dos siman. Cambionan ta wordo publica den corant.

Banda di e control riba prijsnan maximo stipula pa Gobierno pa e productonan di canasta basico, controladornan di Departamento di Asuntonan Economico ta observa prijs di productonan liber pa cu e publicacion di e macuto di compras semanalmente. Tur siman  controladornan ta observa prijs pa un cantidad di alrededor di 25 producto liber, den 10 supermercado. Tur siman ta varia e lista di productonan liber y supermercadonan observa. E macuto di compras ta wordo publica tur siman riba e website www.deaci.aw y tambe riba e App ‘Control di prijs’.

Tambe controladornan di Departamento di Asuntonan Economico ta controla productonan den supermercado pa cu indicacion di prijs. Tur negoshi ta obliga pa tin indicacion di prijs pa producto of servicio cu ta na benta. Esaki mester ta claramente visibel y lesabel pa e consumidor. Indicacion di prijs tambe por wordo poni pa un stapel of grupo di mesun productonan. Prijs mester  ta indica den valuta Arubiano, unda e simbolo di ‘florin’ ta wordo uza.

Pa mas informacion por bishita nos website www.deaci.aw pa keda informa di tur e publicacionnan di Departamento di Asuntonan Economico. Cualkier keho of iregularidad por contact Departamento di Asuntonan Economico na 5212400 of via email: info@deaci.aw.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: