Prome Minister Evelyn Wever-Croes: PRONTO LO BIN CU PROTOCOL PA SIGURIDAD NA SCOLNAN

Prome Minister Evelyn Wever-Croes:

PRONTO LO BIN CU PROTOCOL PA SIGURIDAD NA SCOLNAN

Relaciona cu e accion reciente di docentenan relaciona cu preocupacionnan cu tin pa cu siguridad den scolnan, Prome Minister Evelyn Wever-Croes a duna su punto di bista y tambe plannan di Gobierno di Aruba pa brinda siguridad tanto pa docentenan, alumnonan, mayornan y e scolnan mes. Prome Minister a duna di conoce cu e ta comparti e preocupacionnan aki.

Siman pasa tabata tin un incidente cu a conduci cu maestronan a entrega un manifesto na Minister di Enseñansa. Prome Minister mesora a tuma pasonan necesario pa haci un inventarisacion pa mira na unda nos ta para den cu siguridad den enseñansa. E mandatario principal di nos pais a duna di conoce cu pa basta tempo caba Aruba lo mester tawatin un protocol cu ta atende cu e tema aki, sinembargo a bin resulta cu tin protocolnan di hopi aña caba pero no tin nada concreto.

Prome Minister a haci un apelacion na Minister di Enseñansa y Minister di Husticia pa hunto y mas pronto posibel finalisa e protocolnan aki, mirando cu varios trabou a wordo haci durante añanan tocante e protocolnan aki pero nada a wordo finalisa. E Ministernan concerni, conhuntamente cu maestronan lo mester yega na protocolnan cu ta aplicabel pa Aruba.

Ya e reunionan a cuminsa tuma luga caba. Prome Minister ta den contacto tambe cu SIMAR pa si tin algo cu di su banda e por haci pa avansa e trabounan aki. Siguradad na nos scolnan ta bay mas leu cu ora un mayor lanta man y dal un maestro, cu ta totalmente inaceptabel, intolerable, y contra ley. Aparte di esaki, mester bin un estudio riba e motibonan y circumstancianan cu ta conduci na e comportacion aki. Un cos ta sigur, agresion den su totalidad sea di mucha cu mucha, mucha cu docente, mayor cu docente, y como tambe siguridad di otronan rond di scol, no ta aceptabel.

Gobierno lo traha riba un plan extenso y integral na unda cu lo involvi Minister di Asuntonan Social tambe pa cu e parti di Plan di Crisis Social pa fomenta mas tolerancia y no violencia.

“Mi a pidi e ministernan concerni pa percura pa finalisa e protocol mas lihe posibel pa asina cuminsa implementa esaki mas lihe tambe”, Prome Minister a duna di conoce.

Prome Minister Evelyn Wever-Croes

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: