Kursistanan di e kursononan“Karpinte” i “Kuido pa grandi” a risibí nan sertifikado den Sentro di Bario Lagun.

Kursistanan di e kursononan“Karpinte” i “Kuido pa grandi” a risibí nan sertifikado den Sentro di Bario Lagun.

Willemstad – Djasabra dia 6 di aprel 2019, 6:30 di atardi den Sentro di Bario Lagun, su Ekselensia Señor Minister ing. Hensley Koeiman di Ministerio di Desaroyo Sosial, Labor i Bienestar a duna un diskurso na klousura di dos kurso den kual 7 habitante di Bándabou a haña oportunidat pa siña fishi di karpinté i 9 habitante di Bándabou a haña e oportunidat pa siña e fishi di kuido pa grandinan i di kual algun tambe a risibí nan sertifikado di Krus Kòrá pa ta kompletamente sertifiká pa atendé ku hende grandi.

E partisipantenan a haña entrenamentu kon pa manehá nan mes servisio estilo di ZZP er (ku ta zelfstandige zonder personeel ) di un kantidat di instruktor kualifiká. E motornan tras di e kursonan aki tabata dos siudadano di Bándabou mes: Sr. Gunther Jamanika i Sra Netely Jamanika-Minguel. Tur dos a hasi hopi esfuerso pa e por a bira realidat. E kursonan tabata bou di koordinashon di Sentro pa Trabou di Ministerio di Sektor di Labor ku asistensia di e Sekretaria General Sra. Bernice Calmes i Direktor di Labor Sra. Donate (Donna) Philbert-Nieveld ku a hasi tur kos na nan alkanse pa e proyekto por a bira un éksito rotundo, no opstante tur reto entre otro esun finansiero .

Su ekselensia Minister Hensley Koeiman, durante su diskurso, a trese dilanti ku e kurso na Lagun ta den kuadro di su 5 prioridatnan ku ta enserá, 1. mehorá e situashon sosial ekonómiko i kalidat di bida di e hende den bario, 2. duna formashon kontinuo pa e hende por sigui desaroyá su mes, 3. traha riba perspektiva pa e hende den bario, 4. fortifiká i empoderá e famianan den bario, 5. traha riba oportunidat di empleo pero tambe formanan kreativo pa e hende siña lora man pa gana su pan di kada dia pa su mes i su famia i asina engrandesé su famia, i su bario.

E aktividat aki no tabata posibel sin e kooperashon di e dinámiko pareha Jamanika ku huntu ku nan instruktornan hopi motivá manera entre otro: Sr. Frensel Ignacio ku a duna e kurso di karpinté, Andy ku a duna instrukshon di fisioterapista, i tambe, e Sra. hopi dinámiko, Rose Curial ku a duna e kurso di Rode Kruis.

Sektor di Labor ta orguyoso ku nos por a inkorporá diferente aspekto di e sustainable development goals, STD#1: prevenshon di pobresa pasobra e kursistanan a siña un fishi ku nan por gana nan pan di kada dia, STD#5: igualdat di género: pasobra nos tabata tin un hende muhé Sra. Cynthia Sluis ku a risibí su sertifikado den karpinteria, STD#8: trabou desente pasobra e kursistanan por traha ku e abilidatnan ku nan a siña i nos Pais en todo kaso por importá 16 persona menos pasobra nan ta sertifiká pa hasi un trabou riba nivel. Tambe nos a kumpli ku STD#11: ku ta pone emphasis riba krea un komunidat sustenibel pasobra esnan ku ta terminá e kurso ta bai duna e servisio den nan mes komunidat.

Riba e kombinashon di portrèt por mira algun momento durante di e klousura i entrega di sertifikado na Sentro di Bario Lagun. Nos ta deseá e kursistanan den kual tambe tabata tin hóben, hopi éksito ku uso di nan sertifikadonan den nos komunidat i ya kaba ta invitá pueblo di Kòrsou pa hasi bon uso di e servisio ku nan por brinda.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: