Karta di parlamentario Curtley Obispo dirigi na Minister di Tráfiko, Transporte i Planifikashon Urbano, señora Zita Jesus Leito MBA ku tópiko: status di kuentanan anual pendiente te ku aña 2017 di fundashonnan di Pais Kòrsou ku ta kai bou di portafolio di Minister di Tráfiko, Transporte i Planifikashon Urbano.
Minister di Tráfiko, Transporte i Planifikashon Urbano
Señora Zita Jesus Leito MBA
Seru di Arrarat, parsela C
Presente
Djaweps, 11 aprel 2019
Tópiko: : status di kuentanan anual pendiente te ku aña 2017 di fundashonnan di Pais Kòrsou ku ta kai bou di portafolio di Minister di Tráfiko, Transporte i Planifikashon Urbano.
Apresiabel señora Minister Zita Jesus Leito,
Duna kuenta i rason na tempu ta konta tambe pa fundashonnan ku ta entidatnan di Pais Kòrsou. Fundashonnan ku ta entidatnan di Pais Kòrsou, ku segun nan statutonan i e lei di Corporate Governance, mester kumpli i entrega tur aña na tempu nan kuenta anual audita (“gecontroleerde jaarrekening”) i tambe raporta riba funshonamentu di Corporate Governance.
Aña pasa riba 14 sèptèmber 2018, nos Frakshon di PAR den Parlamento di Kòrsou den un komunikado di prensa a indiká ku entre otro i mi ta sita: “Gobièrnu di Kòrsou mester sigui motivá su kompanianan anónimo i fundashonnan pa nan entrega nan kuenta anual te ku 2017 na tempu den aña 2018. No ta aseptabel ku ainda tin sierto kompanianan anónimo i fundashonnan di Gobièrnu ku no a entrega nan kuenta anual te ku aña 2017. Kompanianan i fundashonnan di Gobièrnu di Kòrsou mester ta responsabel i mester duna kuenta i rason den ménos ku seis (6) luna despues di e aña 2017 na Gobièrnu. Den aña 2019 nos ta spera ku kompanianan òf fundashonnan di gobièrnu lo sòru di kumpli i entrega nan kuenta anual 2018 promé ku 1 yüli 2019”.
Den e Rapòrt di Maneho Finansiero di Pais Kòrsou di Yanüari 2019 (FMR Yanüari 2019), anekso (“bijlage”) 4, mi a tuma nota ku te ainda tin diferente fundashonnan ku ta entidatnan di Pais Kòrsou i ku ta kai bou di portafolio di Minister di Tráfiko, Transporte i Planifikashon Urbano, ku te ainda tin kuentanan anual pendiente pa entrega te ku aña 2017 na Gobièrnu di Kòrsou. A base di Rapòrt di Maneho Finansiero di Pais Kòrsou di Yanüari 2019 (FMR Yanüari 2019), anekso (“bijlage”) 4 i e lei di Corporate Governance, mi ta aserka Minister di Tráfiko, Transporte i Planifikashon Urbano ku e siguiente preguntanan, hasiendo uso di mi derecho komo parlamentario pa hasi pregunta konforme artíkulo 96 di Reglamentu di Orden di Parlamento di Kòrsou:
Stichting Wegenfonds
-
- Kiko ta e motibunan konkreto ku Stichting Wegenfonds segun e FMR Yanüari 2019 Anekso 4, no a entrega su kuenta anual audita di aña 2017 na Gobièrnu di Kòrsou?
- Ki dia Parlamento di Kòrsou lo risibí di Gobièrnu di Kòrsou e kuenta anual 2017 audita di Stichting Wegenfonds?
Fundashon Kas Popular
- Kiko ta e motibunan konkreto ku Fundashon Kas Popular segun e FMR Yanüari 2019 Anekso 4, no a entrega su kuenta anual audita di aña nan 2012 te ku aña 2017 na Gobièrnu di Kòrsou?
- Ki dia Parlamento di Kòrsou lo risibí di Gobièrnu di Kòrsou e kuenta anual audita di aña nan 2012 te ku aña 2017 di Fundashon Kas Popular?
Stichting Kadaster en Openbare Registers Curaçao
- Kiko ta e motibunan konkreto ku Stichting Kadaster en Openbare Registers Curaçao segun e FMR Yanüari 2019 Anekso 4, no a entrega su kuenta anual audita di añanan 2013 te ku 2017 na Gobièrnu di Kòrsou?
- Ki dia Parlamento di Kòrsou lo risibí di Gobièrnu di Kòrsou e kuentanan anual audita di añanan 2013 te ku 2017 audita di Stichting Kadaster en Openbare Registers Curaçao?.
Atentamente,
Curtley Obispo
Parlamentario pa Kòrsou
PAR
