Pa ougùstùs tin intenshon pa kuminsá ku e estudio di hortikultor (hovenier)

Pa ougùstùs tin intenshon pa kuminsá ku e estudio di hortikultor (hovenier)

WILLEMSTAD- Den kuadro di optimalisashon i ampliashon di oportunidat pa nos hóbennan i teniendo kuenta ku e nesesidat di merkado laboral, pa ougùstùs próksimo ta e intenshon pa kuminsá ku un estudio nobo di hortikultura riba nivel 2 i 3. 

E estudionan aki ta wòrdu ofresé dor di Maris Stella SBO (RK) na Grebbelinieweg. 

E estudio den hortikultura ta pone atenshon riba diferente tema, manera entre otro kultivo di plantashon, preparashon di un tereno, atendé sistemanan di pasa pipa/ drainage, awa/ pone bassin/ traha laguna artifisial, trabounan di konstrukshon, kòrta mata, pone i mantene un area bèrde, pone fasilidatnan tékniko. 

Alabes ta duna atenshon na materianan general manera idiomanan Papiamentu, Hulandes, Ingles i Spañó i tambe formashon di e siudadania en general. 

Despues di estudio riba nivel 2 of 3 e persona mester por entre otro bou di guia, pone lokual ta bèrde (groen) i mantené esaki. Esaki por ta den kuranan partikular, pero tambe pa e seno gobernamental i den parkenan. 

Riba e potrètnan na momento ku direktor di skolnan katóliko ta entregá e proposishon na Minister Marilyn Alcalá-Wallé, kompañá pa sra. Nehed Lo-A-Tjong, directeur Maris Stella SBO i sr. Wladimir Kleinmoedig, sectordirecteur a.i. Uitvoeringsorganisatie Onderwijs en Wetenschap.