KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

NOTISIA

MUSTANG CLUB CURACAO I PRESTIGE FORD HUNTU DEN PROMÉ EKSPOSISHON DI FORD MUSTANG DEN SAMBIL

MUSTANG CLUB CURACAO I PRESTIGE FORD HUNTU

DEN PROMÉ EKSPOSISHON DI FORD MUSTANG DEN SAMBIL

 

WILLEMSTAD – Dianan 20 i 21 di aprel próksimo lo tuma lugá e promé eksposishon di outonan Ford Mustang den Sambil. Ta trata aki di un koperashon tripartit entre Mustang Club Curaçao ( MCC), Prestige Ford i tambe Sambil Mall, ku a pone e espasio na disposishon.

Manera ta konosí, dia 17 di aprel awor, Ford Mustang, un dje asina yama “Muscle Cars” ta kumpli 55 aña di eksistensia.  Den kuadro di esaki, tantu MCC, Prestige Ford i Sambil Mall a uni huntu pa trese algun grandi pa Kòrsou. E intenshon ta pa e eksposishon aki bira algu ku ta ripití tur aña di nobo durante e periodo ku Mustang ta di fiesta.

HISTORIA DI MUSTANG

Ford Mustang originalmente tabata un outo di dos asiento kompakto  ku a ser presentá komo konsepto na 1962. Na 1963 el a evolushoná den Mustang II  ku tabata un vehíkulo di 4 asiento i asina ei a kuminsá ku su produkshon i dia 17 di aprel 1964, a lansa e promé vehíkulonan komersial pa públiko. Na e momentunan aki Ford Mustang a konosé no menos ku 6 generashon añanan:

E seis generashonnan ta repartí den e siguiente forma: Promé Generashon di 1965 – 1973; Di dos Generashon di 1974 – 1978; Di tres Generashon di 1979 – 1993; Di kuater Generashon di 1994 – 2004; Di sinku Generashon di 2005 – 2014 i Di seis Generashon di 2015 – Presente. Ford Mustang konosé 4 modèl di su vehíkulonan, esta Cupé, Hatchback, Fastback i tambe Convertible.

PROMÉ EKSPOSISHON

Dianan 20 i 21 awor,  Mustang Club Curaçao, den estrecho koperashon ku Prestige Ford BV, pero tambe Sambil Curaçao a  uni ku otro pa asina ei brinda pueblo di Kòrsou un eksposishon grandi di outonan Mustang ku tin aki na Kòrsou. Te na e momentunan aki tin mas ku 30 vehíkulo registrá ku lo kubri un gran mayoria di e 55 aña di eksistensia di Mustang, pues sigur tur e 6 generashonnan. E eksposishon aki lo kuminsá for di 10 di mainta, kaminda durante un i tur  grátis por bishita Sambil i disfrutá di e diferente vehíkulonan ku tin na eksposishon aki.

PRESTIGE FORD RIBA FACEBOOK

Un i tur ku bishita e Promé Eksposishon di Ford Mustang den Sambil, na momentu ku nan  saka un sèlfi ku un dje vehíkulonan i post like i tag ( No hashtag, pero tag i e página) esaki riba e Facebook Page di Ford Curaçao, nan lo bini na remarke pa gana un dje vários premionan ku  e agensia di outo aki ta pone na disposishon.

Mustang Club Curaçao, Prestige Ford i Sambil Curaçao ta invitá pueblo di Kòrsou pa asistí na e evento aki, dianan 20 i 21 di aprel awor, kaminda por disfrutá den tur trankilidat di e diferente vehíkulonan aki. Manera anunsiá, Sambil djasabra dia 20 di aprel ta habri for di 10 or di mainta i djadumingu for di 12 or di mèrdia. No laga e oportunidat ki pasabo voorbij.

Atentamente

Mustang Club Curaçao

Potrèt: Riba e foto aki por mira representantenan di MMC i Prestige Ford despues di un reunion fruktífero.  D.r.p.d. Sra. Jenia Iltes di Prestige Ford, Sr. Marwin Muzo, Sra. Tamara Muzo i Sr. Jean Paul Nicasia tur di MMC i tambe Sr. Gregory Djotaroeno di Prestige Ford.

Leave a Reply

This site uses Akismet to reduce spam. Learn how your comment data is processed.