Wes ta dikta sentensia den kaso di tráfiko na Bandabou kaminda un persona a pèrde su bida

Info OM (pap)

Wes ta dikta sentensia den kaso di tráfiko na Bandabou kaminda un persona a pèrde su bida

Riba 6 di ougustus 2018 e sospechoso R.E.H. (aktualmente bibá na Hulanda) tabata kore riba e banda kontrali di kaminda. E sospechoso a sali for di bògt i bai dal kontra di un otro outo. E persona ku tabata manehá e vehikulo aki, un turista Aleman, a trata na desvia door di brek i purba hala su outo, pero lamentablemete esaki no a logra. A konsekuensia di e aksidente, e turista Aleman a fayesé i su partner a resultá gravemente herida.

For di investigashon a resultá ku e sospechoso tabata bou di influensia di alkohòl, i esaki na un kantidat mas ku 4 biaha lokual ta permiti pa lei. Tambe e sospechoso tabata usa medikamentu ku ta pone e no mag bebe òf mester hasi esaki di un manera hopi moderá.

Durante un seshon den Korte dia 27 di yanuari 2019, Ministerio Públiko a eksigí un kastigu di prizòn di 24 luna i 4 aña ku e sospechoso no mag maneha un vehíkulo. E famianan di e defuntu por a sigui e kaso via di un konferensia di video.

Djarason 17 di aprel 2019 wes tabata di akuerdo ku e sospechoso a hasi su mes kulpabel na korementu imprudente i deskabeyá. Korte a dikta sentensia I a duna un kastigu konforme petishon di Ministerio Públiko, esta 24 luna di prizon i 4 aña ku e no mag maneha un vehikulo.