Minister Xiomara Ruiz-Maduro ta felicita: Ronan van Putten cu su premio Copa Gobernador Felipe B. Tromp como hoben cu ta destaca riba e tereno social na nos Pais
Minister Xiomara Ruiz-Maduro ta felicita:
Ronan van Putten cu su premio Copa Gobernador Felipe B. Tromp
ORANJESTAD – Ronan ta un hoben a destaca riba e tereno social na nos Pais. Ronan ta un studiante di ‘Sociaal Pedagogisch Medewerker’ na EPI. E ta practica diferente deporte y ta Presidente di Circle K di Colegio EPI.
Di parti di Asociacion Trabou pa Hubentud Aruba y CEDE Aruba, Ronan a ricibi varios reconocemento pa su dedicacion na trabou boluntario den nos comunidad. Ronan a participa na varios seminario riba tereno di ‘Student Leadership’.
Den cuadro di proyectonan di Kiwanis Club, Ronan a participa na diferente proyecto social, manera yuda recauda fondo pa Centro di Bario Tanki Lendeert, ‘Back to school project’ y ‘Aruba Reef Care.’ Ronan a yuda organisa dia di deporte pa clientenan di Sonrisa, paseo cu muchanan di Casa Cuna y yuda verf Colegio Felipe B. Tromp. Ronan ta un boluntario tambe pa yuda recuada fondo pa Koningin Wilhelminafonds.
Ronan ta un ehempel di un hoben di apenas 19 aña cu ta mustra interes pa yuda otro, participa den diferente proyecto pa socialisa y conoce otro persona y cu un talento pa liderazgo.
Minister Ruiz-Maduro ta expresa palabra di pabien na Ronan pa su participacion activo y positivo den comunidad.
