Parlamentario Curtley Obispo: Maneho di e kosta di Pais Kòrsou: e pasado, e presente i nos futuro

Maneho di e kosta di Pais Kòrsou: e pasado, e presente i nos futuro.

Durante e reunion di Parlamento di Kòrsou, di dia 2 di mei 2019, parlamentario Curtley Obispo a haña kontestanan di Minister di Tráfiko, Transporte i Planifikashon Urbano, señora Zita Jesus Leito. Kontestanan riba tur su 26 preguntanan pa loke ta maneho di kosta di Pais Kòrsou entre 10 òktober 2010 te ku 28 mei 2017. Preguntanan pa midi i sa kual ta e herensia di bòshi i tròshi di retonan/ problemanan kual e aktual Gobièrnu di Kòrsou a topa ku n’e, e promé dia riba 29 mei 2019. Preguntanan kual tabata basa riba normanan manera: (1) Buki 5 di  Kódigo Sivil, (2) Lei i dekreto nashonal di “Openbare Stranden” di Pais Aruba i (3) e “Beach Policy” di Pais Sint Maarten.

A base di e kontestanan risibí i e normanan ariba menshoná, parlamentario Curtley Obispo por konkluí di e pasado di maneho di kosta di Pais Kòrsou entre 10 òktober 2010 te ku 28 mei 2017. Ku entre otro: (1) no tabatin un vishon i maneho riba papel pa nos kosta di Pais Kòrsou, (2) no tabata tin inventarisashon a base di Buki 5 di Kódigo Sivil, (3) no tabatin tin un maneho di playa ku su intenshonnan i su kuadro di evaluashon, i (4) no tabata tin sufisiente kontròl i mantenshon a base di lei. Pa loke ta e presente di maneho di kosta di Pais Kòrsou, parlamentario Curtley Obispo a indiká ku a base di e herensia di bòshi i tròshi di retonan/problemanan di pasado, e aktual Gobièrnu di Pais Kòrsou ta trahando ku determinashon riba un dokumento di vishon ku solushonnan pa ku kosta di Pais Kòrsou. Pa loke ta trata e futuro di maneho di kosta di Pais Kòrsou , parlamentario Curtley Obispo ta boga pa e aktual Gobièrnu di Kòrsou presentá na Parlamento di Kòrsou mas pronto posibel den aña 2019: (1) un dokumento final di vishon pa ku kosta di Pais Kòrsou i (2) un plan integral ku akshonnan konkreto pa ku kosta di Pais Kòrsou basa riba e dokumento di vishon, Buki 5 di Kódigo sivil i otro normanan. Un plan di akshon inkluyendo tambe e responsabilidat di e aparato gubernamental asigná den kuadro di kontròl i mantenshon di lei pa ku kosta di Pais Kòrsou.

Parlamentario Curtley Obispo tambe a kòrda tur hende riba nos Himno di Kòrsou i a sita: “I ora nos ta leu fo’i kas nos tur ta rekordá Kòrsou, su solo i playanan, orguyo di nos tur”. P’esei huntu nos tin ku sigui traha riba un futuro briante pa nos kosta di Pais Kòrsou ku e meta bienestar i progreso.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: