Kòrsou ta lamentá echonan ínkorekto den moshon relashoná ku ekspulshon di refugiadonan for di Kòrsou

Kòrsou ta lamentá echonan ínkorekto den moshon relashoná ku ekspulshon di refugiadonan for di Kòrsou

Geplaatst op 15 Mei 2019 dor di Ministerio di Asuntunan General i Promé Minister

WILLEMSTAD – Gobièrnu di Kòrsou a tuma nota di e moshon ku Parlamentu di Hulanda (Tweede Kamer) a adoptá djamars relashoná ku ekspulshon di refugiadonan for di Kòrsou. Gobièrnu normalmente no ta reakshoná riba moshonnan di ‘Tweede Kamer’, ya ku nan ta dirihí na Gobièrnu di Hulanda. Sinembargo, ta trata na e momentunan akí di sirkumstansianan fuera di normal pa Kòrsou debí e krísis na Venezuela i konsekuensianan ku impakto grandi pa nos isla. E situashon en partikular akí ta pone ku Gobièrnu komo eksepshon tin ku komentá riba kontenido i propósito di e moshon di Parlamentu Hulandes, debí e importansia pa un aserkamentu integral di e krísis akí den Reino.

Gobièrnu ta kontentu ku e atenshon ku ‘Tweede Kamer’ tin pa e krísis den nos pais bisiña i e efektonan grave ku esaki tin riba e paisnan Karibense di Reino. Finalmente, tantu e krísis mes ku su komplikashonnan geo-polítiko difísil komo e impakto grandi manifestá na diferente forma ku e krísis tin riba e islanan, ta rekirí un enfoke riba nivel di Reino. Apesar di esaki Gobièrnu di Kòrsou ta lamentá ku a tuma e moshon basá riba opservashonnan ku no ta kuadra ku echonan.

Den e moshon, ku un mayoria grandi a tuma, ‘Tweede Kamer’ ta pidi Gobièrnu di Hulanda pa eksihí Gobièrnu di Kòrsou pa semper hasi kòntròlnan individual segun reglamentunan internashonal, promé ku manda personanan bèk Venezuela ku a pidi pa protekshon. Gobièrnu di Kòrsou ta afirmá importansia di esaki i pues ta enfatisá ku un sierto kòntròl individual ya ta forma parti di e proseduranan eksistente na Kòrsou pa ku petishon pa protekshon basá riba artíkulo 3 di e Tratado Oropeo di Derecho Humano (EVRM). A dediká hopi atenshon último tempu na e prosedura akí ku yudansa di servisionan hulandes manera entre otro IND.

Ta lamentabel si ku ‘Tweede Kamer’ atraves di e konsiderashonnan menshoná den e moshon, ta konkluí di forma kompletamente inhusto ku Kòrsou lo a manda bèk refugiadonan ku ta rekonosé dor di UNHCR. Gobièrnu ta enfatisá ku esaki ta un impreshon ínkorekto di kosnan, ku tampoko ta konstatá pa organisashonnan internashonal manera eróneomente menshoná den e moshon. Na Kòrsou no tin persona ku e státus di refugiado rekonosé pa UNHCR ku a manda bèk Venezuela i Kòrsou no tin pensá di bai hasi esei tampoko. Es mas, pa algun di e personanan ofisialmente rekonosé pa UNHCR komo refugiado, tin entrevistanan ta tumando lugá ku paisnan kaminda e refugiadonan rekonosé por bai re-establesé permanentemente.

‘Tweede Kamer’ aparentemente no ta kompletamente na altura di e situashon spesífiko andando na Kòrsou, ni di e proseduranan ku ta konta pa nos pais. Esei ta di lamentá mirando e atenshon riba nivel di Reino nesesario pa e krísis i konsekuensianan grandi di esaki. Banda di e migrashon di miles di Venesolano pa nos isla, prinsipalmente di forma ílegal via boto, tin konsekuensianan sosial i ekonómiko grandi tambe pa entre otro nos refineria, haf, turismo i komersio.

Parlamentarionan Merikano si a resultá di tin tur detaye tokante e situashon na Kòrsou i e retonan ku nos isla ta enfrentá. Esaki a bin klaramente dilanti durante e bishita di trabou di Promé Minister Rhuggenaath na Washington D.C. na komienso di e siman akí, kaminda el a kombersá entre otro ku algun miembro di Kongreso. Resientemente un kantidat di shete miembro di Kongreso Merikano tambe a bishitá Kòrsou pa profundisá nan mes den e efektonan di e krísis Venesolano pa nos isla, ora nan tabata na kaminda pa frontera ku Colombia pa por mira ku nan propio wowo konsekuensia di e éksodo di miones di Venesolano for di nan tera natal pa paisnan bisiña. Durante di e bishita di trabou na Washington, Promé Minister Rhuggenaath a risibí gran elogio pa e ròl di Kòrsou di miembronan di Kongreso i representantenan di Gobièrnu di Merka, inkluso e ‘Special Envoy’ pa Venezuela, Sr. Elliott Abrams, i ‘Under Secretary of State’, sr. David Hale. Tambe tabatin interes grandi pa e problemanan severo ku Kòrsou ta eksperensiá pa motibu di e krísis.

Gobièrnu di Kòrsou ke logra den Reino ku di forma integral i profundo tin atenshon pa e situashon no usual i kompliká ku e paisnan Karibense di Reino ta enfrentá. Durante di e kosulta resien entre Minister di Asuntu Eksterior, sr. Stef Blok, i e Promé Ministernan di Kòrsou, Aruba i Sint Maarten, a hasi un promé paso den e direkshon akí. Meskos a tuma lugá durante bishitanan resien di Minister di Asuntu Interior, sra. Ollongren, i Sekretario di Estado di Relashonnan den Reino, sr. Knops, i tambe Minister di Hustisia i Seguridat, sr. Grapperhaus, i Sekretario di Estado di Hustisia i Seguridat, sr. Harbers.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: