sra. Pauletta di frakshon di PAR, Tópiko: ‘remarkabel kuantu keho tin pa ku abuso laboral’

Na: Minister di Desaroyo Sosial,  Labor i Bienestar

Sr. H. Koeiman

Tauber-building, Prinsenstraat

Presente 

Kòrsou, 21 di mei 2019 

Tópiko: ‘remarkabel kuantu keho tin pa ku abuso laboral’

 Apresiabel minister Koeiman,

Organisashon Internashonal di Labor (ILO) durante e aña 2019 a dediká den kuadro di selebrashon di 100 aña ILO hopi atenshon na abuso laboral. Abuso laboral di tur tipo i den tur sektor.

Ta remarkabel kuantu keho tin pa ku abuso laboral. Riba tereno finansiero, di intimidashon i mal uso di poder. Ehèmpelnan; risibí ménos pago pa trabounan nan realisá i/òf keda eksihí pa traha mas ora ku e ora indiká den e kontrato. Den sierto kaso asta keda ningá i/òf tarda pa risibí un kontrato laboral.

Banda di ku e persona por skohe pa bandoná di forma boluntario su boka di trabou, e por kousa ku e persona ta keda retirá inhustamente. Kreando un situashon di falta di entrada den kas di famia. E efekto emoshonal di abuso laboral tambe por ta grandi. Esaki por krea trouma ku ta tarda hopi aña pa saneá. Abuso laboral tin ademas un konsekuensia físiko, kaminda ku e persona por asta bira malu pa e stress laboral.

Artíkulo 1614y di Kódigo Sivil Buki 7a, ta eksigí di kada doño di trabou ku e ta hasi tur loke ta den su alkanse pa e ta un bon doño di trabou.  protehá e trahadó i tambe krea un ambiente di trabou sano. Ta importante ku kada doño di trabou por demostrá kon e ta implementá esaki na su lugá di labor, riba base di protokòl i reglanan. Pero pa reforsá e artíkulo aki, komo pais, Kòrsou mester salbaguardiá tambe ku tin un mekanismo  di kontrol na lugá pa asina aki por vigilá ku e lei ta wòrdu apliká.

Den kuadro di esaki algun pregunta pa Minister di Desaroyo Sosial, Labor i Bienestar (DSLB):

 

  1. Minister Koeiman lo por a fasilitá Parlamento ku e último investigashon ku Ministerio di DSLB a realisá enfoká riba abuso laboral?
  2. Minister Koeiman lo por fasilitá parlamento ku e último sifranan pa ku kehonan di abuso laboral hasí na ministerio di DSLB?
  3. Minister Koeiman por indiká kua ta e kaminda pa un persona kana pa asina entregá un keho di abuso laboral.

 

  1. Minister Koeiman por informá Parlamento na kua kriterio e departamento di inspekshon laboral ta tene su mes na momento di hasi kontrolnan pa ku abuso laboral?
  2. Minister Koeiman lo por indiká na Parlamento kua medidanan ta wòrdu imponé riba doñonan di trabou ku kometé abuso laboral i/òf permití abuso laboral na e sitio di trabou?

Atentamente,

 

Ana Maria Pauletta

Miembro di Parlamento Partido Alternativa Real

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: