Médikonan suspendé na Hulanda, por bin Kòrsou i ehersé nan funshon sin ningun problema

Willemstad, 28 di mei 2019

 

Presidente di Parlamento di Kòrsou

Sr. W. Millerson

Wilhelminaplein # 4

PRESENTE

 

Señor Millerson,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di GMN, señora S. Camelia-Römer.

 

Danki pa e koperashon.

 

Atentamente,

 

Jacinta Constancia

Miembro di Parlamento

pa frakshon di MFK

 

Minister di GMN

Señora S. Camelia-Römer
PRESENTE

Kòrsou, 28 di mei 2019


Tópiko: Médikonan suspendé na Hulanda, por bin Kòrsou i ehersé nan funshon sin ningun problema


Señora Minister Camelia-Römer,

Suskrito miembro di Parlamento pa frakshon di MFK, señora Jacinta Constansia, a tuma nota den prensa i riba retnan sosial un artíkulo ku ta indiká ku médikonan ulandes ku a ser suspendé na Hulanda por i/òf ta bin Kòrsou i ehersé nan profeshon.

 

Komo representante di pueblo esaki ta lanta un preokupashon hopi grandi serka mi persona, debí ku tratamentu médiko pa siudadanonan di Kòrsou mester wòrdu atendé di un forma diligente i no por ta asina ku esnan ku faya na Hulanda i wòrdu suspendé ta bin Kòrsou i ehersé nan funshon komo si fuera nada no a tuma lugá.

 

Pueblo di Kòrsou tin derechi riba un kuido médiko konfiabel i ku médikonan ku nan kredibilidat ta intachabel i nos no por ta e prùlebak pa médikonan ku wòrdu suspendé na Hulanda. Suskrito konforme artíkulo 96 di Reglamento di Orden di Parlamento ta hasi e siguiente preguntanan na Minister Camelia-Römer.

 

Esaki ta trese mi na e siguiente preguntanan na minister;  

 

  1. Minister por indiká kua ta e instansianan ku ta enkargá ku registrashon di un médiko di kas i/òf spesialista ku ta bin traha na Kòrsou?

 

  1. Kua ta e funshon (ròl) di Minister di GMN den e trayekto di registrashon di un dòkter di kas i/òf un spesialista?

 

  1. Ta hasi un investigashon di integridat den e trayekto di registrashon di un dòkter di kas i/òf spesialista promé ku e ser registrá pa por ehersé labor na Kòrsou?

 

  1. Minister a tuma nota di e artíkulo den media i riba retnan sosial ku ta indiká ku médikonan ulandes ku a ser suspendé na Hulanda por i/òf ta bin Kòrsou i ehersé nan profeshon?

 

  1. Ta bèrdat ku na Kòrsou tin médikonan ku a ser suspendé na Hulanda ta laborá?

 

  1. Si kontesta na pregunta 5 ta afirmativo, Minister por informá Parlamento kuantu médiko di kas i kuantu spesialista tin ta funshoná na Kòrsou i ku a wòrdu suspendé na Hulanda?

 

  1. Minister ta di akuerdo ku médikonan suspendé na Hulanda òf kualkier otro parti di mundu por bin Kòrsou i ehersé nan profeshon sin mas?

 

  1. Minister ta haña ta korekto ku nos leinan ta permití ku médikonan suspendé por ehersé nan funshon aki na Kòrsou?

 

Nos ta spera un kontesta mas pronto posibel di parti di minister debí ku manera ya menshoná e informashon aki ta preokupante, debí ku gobiernu ta pone den area di salubridat médikonan i spesialista ku no ta gosa di kredibilidat den nan propio pais.

 

Atentamente,

     

 

Jacinta Constansia

Miembro di Parlamento

pa frakshon di MFK

This site uses Akismet to reduce spam. Learn how your comment data is processed.

error: Content is protected !!
%d bloggers like this: