Dikon for di 19 mart 2015, e edifisio di SOAW den Punda no tabata kumpli ku normanan?

Dikon for di 19 mart 2015, e edifisio di SOAW den Punda no tabata kumpli ku normanan?

Durante e reunion di 27 mei 2019, parlamentario Curtley Obispo a hasi preguntanan pa haña mas klaridat i mas informashon pa loke ta trata e historia di hür di e edifisio di SOAW den Punda. Ta trata di entre otro e siguiente preguntanan na Minister di Desaroyo Sosial, Labor i Bienestar, señor Hensley Koeiman:

(1) Riba 19 mart 2015 a firma un kontrakt pa e edifisio di SOAW den Punda. E promé kontrakt firma 19 mart 2015 ta resultado di un destaho públiko? Si òf No. Dikon si òf no?

(2) Kua ta e status di e 10 puntonan di e “vastellingsprotocol” firma 2 febrüari 2019 entre ABVO i Minister Desaroyo Sosial, Labor i Bienestar?

(3) Si apliká e normanan di rapòrtnan di entre otro Plan D2,  Brandweer di Kòrsou, Inspekshon di Seguridat Laboral i Arbo Consult. Pregunta ta si a base di e normanan aki e edifisio di SOAW den Punda riba 19 mart 2015 i despues tabata kumpli ku e normanan pa loke ta: (a) funshonalidat/kantidat personal, (b) salubridat i (c) seguridat pa loke ta trata aspektonan di: “toegankelijkheid, vluchtveiligheid, brandveiligheid i gebruikersveiligheid”?. Dikon for di 19 mart 2015, e edifisio di SOAW den Punda no tabata kumpli ku e normanan aki?

(4) Kua ta e status aktual pa loke ta trata e Plan Struktural pa trese solushonnan struktural na e edifisio di SOAW den Punda? Tin un plan struktural kaba riba papel? Petishon pa Parlamento di Kòrsou risibí e plan aki.