Konferensia grandi di seguridat na Aruba i Kòrsou.
Konferensia grandi di seguridat na Aruba i Kòrsou.
E Subdivishon Karibe Hulandes di e Sosiedat Merikano pa Seguridat Industrial (ASIS) resién formá ta organisá un konferensia ekstenso den yüni ku tema: Safety & Security.
Ekspertonan rekonosé internashonalmente di diferente parti di mundu lo papia durante e konferensia aki dia 11 di yüni na Renaissance Convention Center na Aruba i dia 13 di yüni na Hilton Hotel Kòrsou.
Tópikonan ku lo bini dilanti ta:
– Prevenshon di Krimen pa medio di diseño di bo medio ambiente: Kon bo ta krea un ambiente seif di biba, traha, i rekreá, dor di tene kuenta netamente ku e aspekto di seguridat na momento ku ta hasi diseño;
– Desaroyonan riba tereno di seguridat den e industria di turismo. Turismo ta un di e pilánan importante di nos komunidat i pues ta importante pa desaroyo kontinuo di e islanan. Turismo sigur lo atraé mas turista;
– Plan pa Kontinuashon di Negoshi. Kada país, kada negoshi i asta kada kas mester tene kuenta ku kalamidatnan i otro desaroyonan ku por afektá e bida di tur dia. Un plan pa kontinuidat di negoshi lo garantisá den momentunan asina ku por bai bèk mas lihé posibel na e situashon normal;
– E Modèl di Seguridat Israëlí. Israël ta internashonalmente konosí komo un país kaminda gobièrnu, komèrsio, i siudadanonan ta traha huntu riba nivel haltu i hopi efisiente na un aserkamentu integral di seguridat. Un eksperto riba e tereno aki lo mustra ku e modèl aki por ta eksitoso serka nos tambe;
– Tiramentu aktivo. Lamentablemente un oumento den e kantidat di arma (ilegal) a kondusí tambe na un oumento den e kantidat di insidentenan ku tiroteo. E presentashon aki lo mustra ku por evitá algun di e insidentenan aki, i tambe kon lo ta mihó pa reakshoná riba nan.
E konferensia ta keda habrí pa Minister di Hustisia i lo sera ku un diskushon di un pènel ku entre otro minister di Hustisia i algun eksperto lokal i internashonal. E pènel lo reakshoná riba opinion di e públiko ku por reakshoná instantáneamente via nan Smartphone riba diferente teoria i formulashon.
Mas informashon tokante e konferensia ta optenibel riba e wèpsait www.asisdutchcaribbean.com òf na number di telefon + 5999 466 1312.
Willemstad, 31 di mei 2019
