Amnesty International di Kòrsou i Ulanda a reuní ku Presidente di Parlamento

Amnesty International di Kòrsou i Ulanda a reuní ku Presidente di Parlamento

Resientemente Presidente di Parlamento di Kòrsou, sr. William Millerson, huntu ku e Presidente di e Komishon figo di Hustisia di Parlamento, sr. Jeser El Ayoubi, tabatin e honor di risibí bishita di e organisashon ku ta salbaguardiá e derechinan fundamental di sernan humano rònt mundu. Amnesty International ku aki na Kòrsou tin un organisashon lokal a ser representá pa su Presidente sra. Jacqueline Martis i miembronan di direktiva sr. Gilberto Benito i sra. Virlène Els.

E delegashon Ulandes di Amnesty International a ser representá pa sr. Eduard Nazarski i sra. Matty Verburg. E bishita tabata den kuadro di un investigashon ku e organisashon ariba menshoná a kondusí aki na Kòrsou un aña pasa i e rapòrt ku e konklushon i rekomendashonnan dokumentá. E intenshon ta ku AI ke deliberá ampliamente ku diferente aktornan di e vèlt tokante e  rekomendashonnan ku e rapòrt enkestion a produsí. Amnesty International ta haña importante ku tin proseduranan kla i definí pa na momentu ku refugiadonan yega nos pais i ke hasi un apelashon pa nan ser protehá. AI ta pone énfasis pa mehorashon di e kondishonnan. Durante e enkuentro ku e representantenan lokal i di Ulanda di AI, énfasis a keda poné riba e refugiadonan ku ta saliendo for di e pais bisiña Venezuela.