KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

NOTISIA

‘Rikesa di Kòrsou’: un sena pa rekoudá fondo pa Casa Hilda

‘Rikesa di Kòrsou’: un sena pa rekoudá fondo pa Casa Hilda

 

Willemstad – Djaweps 2 di mei Casa Hilda, situá den kurason di Otrobanda a kima por kompleto. Mirando ku ta trata di un proyekto ku ta kontribuí na hasimentu di negoshi i tambe na un eksperensia úniko pa nos turistanan, amigunan di Tania Ataoellah-Henriquez, propietario di Casa Hilda, ta organisá un sena pa rekoudá fondo.

E konosido Tania a lanta Casa Hilda 23 di Mei, na aña 2018 ku dos meta prinsipal: stimulá hasimentu di negoshi bou di nos mes hendenan i kontribuí na un eksperensia agradabel pa nos turistanan. Den Casa Hilda, Fundashon Lora Man a organisá mas di 30 kurso grátis pa hóbennan i otro personanan sin trabou siña traha pasapalu i kos dushi di Kòrsou, pa asina nan por garantisá nan propio fuente di entrada. E parti aki ta di sumo importansia, mirando situashon di nos ekonomia. Ademas, Casa Hilda ta un destinashon ku kada dia tabata birando mas popular pa turistanan ku ta bishitá nos isla. Ora nan baha for di barku, nan ta pasa Casa Hilda pa siña kushiná platonan lokal i disfrutá di e sukulento platonan aki ora nan kaba. Tin biaha tabata turista ku ta kedando riba nos dushi isla. Ademas, kompanianan i organisashonnan lokal tambe sa bishitá Casa Hilda ku regularidat. Kushinando, nan ta fortifiká nan ekipo. Pues, di forma indiskutibel por bisa ku Casa Hilda su derechi di eksistensia ta probá.

Sin embargo, djaweps 2 di mei e lokal a kima por kompleto. E edifisio tei, pero parti paden no por a salba praktikamente nada. “Na e momentu ei mi tabatin dos eskoho: pensa ku esaki ta fin di un proyekto asina bunita òf mira e kandela komo un oportunidat pa mehorá e kalidat di produkto i servisio ku Casa Hilda ta ofresé”. Ta di mas bisa ku durante e promé dianan mi tabata kibrá, pero ku e kantidat di sosten ku a yega na mi, no tabatin duda kiko mi eskoho lo mester a bira”. Tania ta splika ku un profundo sentimentu di gratitut, kuantu amigu i konosí a ofres’é yudansa di un òf otro forma. Awe, 3 di yüni, un luna despues di e kandela, e yudansa aki ta kristalisá den anunsio di un evento pa rekoudá fondo.

Na momentu ku Casa Hilda a kima, Fundashon Kas Popular a ofresé Tania e posibilidat di por hasi uzo di e “loods” djis banda di Casa Hilda. Despues di a pidi diferente oferta i hasi komparashon di preis, a kalkulá ku mester di ANG 40.000 pa por drecha e “loods” i hasi esaki operashonal, miéntras ta keda kla ku Casa Hilda. Na momentu ku tur trámite di seguro finalisá i kaba di drecha Casa Hilda, Kòrsou lo tin dos unidat pa por ofresé mas yu di tera treinen i mas turista un eksperensia inolvidabel.

Ku e promé sena pa rekoudá fondo aki, amigunan di Tania ta spera di por rekoudá gran parti di e sèn. Durante e sena mes, lo tin oportunidat pa persona òf organisashonnan ku kier hasi un donashon di kualke forma hasi esaki. Pa esnan ku no por yega riba e dia ei, por hasi donashon riba e siguiente number di kuenta  MCB 27973604 – Tania Ataoellah-Henriquez. Tambe por hasi donashon di material di konstrukshon òf kosnan di uzo den kushina. Por tuma kontakto ku Tania na 519 1007 pa mas informashon.

Durante luna di yüni lo komuniká intensivamente via Casa Hilda su página di Facebook, brindando pueblo di Kòrsou tur informashon tokante e temporada despues di e kandela, te ku e lastu detayenan di preparashon pa e evento. Esaki lo bira un relato ku ta duna speransa pa konstruí loke nos ta deseá, ounke ku kontratempu a bati na nos porta. Pues, “like” e página di Facebook di Casa Hilda for di awor.

E sena ta tuma lugá djabièrnè 28 di yüni di 7’or pa 10’or na kapia di St. Martinus, pegá ku Brionplein. Ta bende karchi for di awor. E karchinan ta kosta ANG 200 i ta inkluí un sena di tres plato, prepará pa e ekspertonan kulinario di Divino Catering. Tema di e anochi ta ‘Rikesa di Kòrsou’, ku lo keda ilustrá pa medio di un programa kargá ku inspirashon i motivashon.

Tania kier gradisí tur ku di un òf otro forma a mustra nan sosten durante e dianan difísil despues di e kandela i na tur ku ta hasiendo e sena posibel.

Pa mas informashon por yama 519 10 07 òf 519 10 06 òf manda un e-mail na casahilda@outlook.com

 

 

 

639114718427035"
639114718427035"