Prome Minister Evelyn Wever-Croes: PREMIER EVELYN WEVER-CROES INVITA PA BILL Y HILLARY CLINTON
Prome Minister Evelyn Wever-Croes:
PREMIER EVELYN WEVER-CROES INVITA PA BILL Y HILLARY CLINTON
Clinton Foundation ya pa algun aña ta activo den Caribe pa yuda e islanan cu wordo afecta pa calamidad, por para riba nan pia bek. Ultimo añanan, Clinton Foundation no ta concentra solamente riba e recuperacion di calamidad, pero ta enfoca den yuda e islanan den Caribe pa crea un fundeshi economico mas solido.
Den esaki Aruba a hala nan atencion, especialmente con Aruba ta purbando a traves di innovacion, pa haci nos economia mas fuerte y resiliente y prepara contra calamidad. E vision innovativo y e vision economico di Gabinete Wever-Croes a wordo reconoci pa Clinton Foundation, como un ehempel pa otro islanan den Caribe sigui. Premier Evelyn Wever-Croes desde un principio ta promove e vision di Gabinete Wever-Croes den exterior, hustamente pa capta atencion di fundacionnan asina cu por pone Aruba den contacto cu inversionistanan.
Pa e motibo aki Premier Evelyn Wever-Croes a ricibi un invitacion personal di Bill Clinton y Hillary Clinton pa participa na e reunionnan di Clinton Global Iniciative (CGI) “Post Disaster Recovery” na St. Thomas dialuna y diamars di e siman aki.
Interesante di e conferencia ta cu varios inversionista grandi di e Fortune 500 companies lo ta presente y lo ta hopi importante pa cera nan conoci cu Aruba.
Premier Evelyn Wever-Croes lo elabora riba e vision di innovacion y e vision economico y pone Aruba asina riba mapa internacional un biaha mas.
Ta un muestra positivo cu nos Premier a wordo invita pa atende e conferencia aki y ta muestra cu esfuersonan di Gabinete Wever-Croes haci pa promove Aruba, ta exitoso. Riba agenda tin un round table meeting riba invitacion di Hillary Clinton, den cual Prome Minister di St
Maarten, Leona Romeo-Marlin tambe lo participa. Tambe tin riba agenda e invitacion di Bill Clinton pa ta parti den un pannel, ademas di un reunion cu e Gobernador di US Virgin Islands, Albert Bryan.
Esaki sigur ta un bon oportunidad pa promove Aruba, y lanta interes den inversionistanan di exterior.
