Gobièrnu ta traha di forma efektivo na solushon pa Oranjeschool

Gobièrnu ta traha di forma efektivo na solushon pa Oranjeschool

Geplaatst op 20 June 2020 dor di Ministerio Enseñansa, Siensia, Kultura & Deporte

WILLEMSTAD – Den e último añanan Oranjeschool a konosé un bahada di e kantidat di alumnonan ku ta bai e skol. Aña eskolar 2020-2021 no ta un eksepshon, kaminda na e momentunan aki tin únikamente 1 pa 4 inskripshon pa Grupo 1. Gobièrnu, ku a sigui e desaroyo aki di serka, ta konsiente ku no ta faktibel i responsabel mas pa mantené e skol habrí i aktivamente a buska un solushon den forma di integrashon di Oranjeschool ku un otro skol públiko den besindario. Di e forma aki ta garantisá akseso i kontinuashon di enseñansa pa e alumnonan. Alabes, a buska un solushon pa ku e edifisio di skol pa e no keda bashí, dor di ubiká Servisio di Skolnan Públiko (DOS) einan. Esaki den kuadro di e nesesidat pa trese transformashon i efisiensia serka diferente ministerio i servisio di Gobièrnu.

Pa loke ta trata sektor di Enseñansa i Siensia i Servisio di Skolnan Públiko (DOS), ta ehekutando vários trayekto di restrukturashon, ku finalmente mester resultá den mihó kalidat di enseñansa. Den kuadro di e kambionan struktural aki, a kuminsá tuma e pasonan nesesario pa informá tantu dosente komo mayornan tokante di e kambio pa ku Oranjeschool. Mayornan a keda informá ku den e bario na práktikamente mesun distansia leu, tin en total 3 otro skol di fundeshi (entre otro skol públiko Pedro Luis Brion) ku ta brinda e posibilidat pa tuma alumnonan di Oranjeschool. Mayornan den e kaso aki ta garantisá di por sigui konta riba akseso, kontenido i nivel di enseñansa.

DOS tambe a bin ta hiba kombersashonnan estrecho ku e dosentenan i a ofresé dosentenan e opshon pa skohe entre algun otro skol p’asina sigui ehersé nan labor. Riba djasabra 20 di yüni a tuma lugá un enkuentro ku direktiva di DOS i dosentenan di Oranjeschool den kompania di sindikato SITEK. E reunion a kana positivo i den bon esfera, kaminda huntu a yega na un entendimentu. Direktiva di DOS a enfatisá di ta balorá tur su dosentenan i a aklará e persepshon robes ku por a surgí. Den e siman benidero lo tuma kontakto i invitá mayornan pa sigui deliberá riba e kambionan ku ta bai tuma lugá.

E realokashon di DOS na Oranjeschool ta kuadra ku e trayekto ku Ministerio di Enseñansa, Siensia Kultura i Deporte (ESKD) tin andando, pa evaluá e edifisionan ku ta hür i bini ku proposishon pa reorganisá e diferente departamentu i organisashonnan di e Ministerio. Esaki konforme e ahustenan finansiero ku mester keda hasí p’asina usa fondonan di pueblo di forma mas efisiente i sigui duna servisio optimal den e ministerio. Den futuro serkano, ta antisipá un mudansa kompleto di e ministerio den e edifisio di Bestuurscollege na Pietermaai kual lo ta muchu mas efisiente pa ku gastu i efektivo dor ku mayoria departamentu ta huntu.

Komo ku Oranjeschool ta bai keda pará bashí, a hasi uso di e oportunidat aki pa konvertí e skol mesora den ofisina sentral di DOS, ku e ora ei di bia ta keda serka di futuro lokalidat di Ministerio di ESKD. Ku invershon mínimo DOS por muda den un edifisio di Gobièrnu – esta un skol bashí – i asina skapa sèn di hür. Esaki sigur ta un desishon positivo den tur sentido di palabra.

Gobièrnu ta realisá ku e desishon pa sera Oranjeschool no ta fásil pa tantu e alumno, mayor i dosentenan. Pa e motibu aki lo guia e trayekto ku e sosten nesesario pa yega na un resultado positivo na bienestar di nos muchanan i di nos pais.

Ministerio konserní 

This site uses Akismet to reduce spam. Learn how your comment data is processed.

error: Content is protected !!
%d bloggers like this: