RESUMEN DI SIMAN 23-30 juni 2019 GOBIERNU DI ARUBA

RESUMEN DI SIMAN 23-30 juni 2019 GOBIERNU DI ARUBA

 

* Nos a habri siman celebrando Dia di San Juan. Un fiesta tradicional cu ta celebra final di temporada di secura y habrimento di temporada di awacero. Ohala cu e fiesta aki trece hopi bendicion pa nos dushi Aruba!

 

* Conseho di Minister a aproba e Plan Nacional pa atende cu cachonan di caya. Despues cu e ley di cacho a pasa 5 aña pasa, awo tin un maneho. E ‘killcage’ ta wordo elimina, un dog act shelter ta wordo crea, y lo bin un campaña di sterilisacion. E plan ta un cooperacion di Gobierno y NGO’s, con pa atende cu e problema aki na forma structura den cual ta pone un trato digno pa e cacho, central. Y den cual tambe ta pone e responsabilidad riba e doño di e cacho. Un danki di curason na tur NGO’s cu ta activo riba e tereno aki tur e añanan. Pabien cu e logro grandi aki!

 

* Fundacion Lisette Gomez y APG a organisa e ultimo charla den e serie aki tocante abuso sexual di mucha. Gobierno ta hopi satisfecho di a partner cu e organisacionnan aki. Presente na e charla tabata Minister President y Minister Rudy Lampe. Den e charla

Aki a enfoca riba e material cu mester wordo duna den scolnan pa conscientisa nos muchanan. Bisa no, core bay y bay keh’e! E unico forma pa nos cuida nos muchanan. 

 

* Siman pasa a traves di e team di FUTURA, nos a cuminsa hiba e mensahe di SDG na scolnan, creando un miho mundo cu e 17 metanan di Nacionan Uni. Nan a bishita Colegio Ora Ubao, Prinses Amalia Basisschool y St. Aloysius School, y na e ultimo aki Minister President tambe a asisti pa mustra e compromiso di Gobierno. Mas di 100 Alumno di klas 6 a siña conoce e 17 metanan di Nacionnan Uni a traves di un wega. E alumnonan a gosa y siña mes momento. 

 

* Team FUTURA a presenta e logronan di e prome lunanan di e aña aki na Minister President y tambe e plannan pa e siguiente lunanan. e-Government, Mo-B, Area, Coding Camp, Innovation Camp, District 297, Mil Idea, SDG Games, y hopi mas. FUTURA ta e fundacion cu Gobierno a institui cu ta encarga cu delinea e plan strategico di innovacion y ehecuta esaki hunto cu sector publico y sector priva. Den poco mas cu un aña a logra hopi caba.

 

* Minister President y Minister di Asuntonan Social a yega na un solucion pa enseñansa avansa pa nos muchanan special: Voortgezet Speciaal Onderwijs pa aña escolar 2020/2021. Pa aña escolar 2019/2020 lo tin un areglo transitorio. Nos no a yega ainda unda nos kier ta, pero nos ta riba e bon caminda!

 

* Proyecto di airco y digitalisacion di Cacique Macuarima birando un realidad. E airconan ta wordo instala caba y pa e aña escolar nobo scol basico Cacique Macuarima lo ta e scol piloto pa innovacion den enseñansa. 

 

* Minister President a reuni cu representante di Kids Rights Empowerment, un organisacion cu ta traha riba conscientisacion contra secuestro di mucha door di un di e mayornan. Lamentablemente sa pasa cu un mayor ta secuestra e yiu y e otro mayor no tin contacto cu n’e. Ta importante pa tur tata sa cu reconoce bo yiu so, no ta suficiente, bo mester haya e ‘ouderlijk gezag’ tambe pa bo tin algo di bisa den su bida. Un yiu merece di tin su mama y su tata den su bida. Ban pone e mucha central.

 

* Minister President a firma un MoU cu Stichting Deugdelijkheid van Bestuur pa haci un National Integrity System Assessment (NIS-A). E gastonan lo wordo carga hunto door di Gobierno di Aruba, Sector Priva y Gobierno di Hulanda. Esaki ta un iniciativa di SDBA lansa durante e ultimo simposio di SDBA. Sector priva y sector publico ta uni forsa pa combati corupcion! 

 

* Minister di Husticia a firma e ordo pa e ekipo di radar pa Cuerpo Policial. Den transcurso di otro siman e ekiponan lo ta riba barco pa cuminsa e biahe pa Aruba y ta ser calcula cu den apenas un par di siman nan lo yega Aruba. Pues pronto Cuerpo Policial di Aruba lo conta cu su propio radar y asina lo sigui optimalisa e cuido di nos fronteranan den cooperacion cu otro instancianan.

 

* Minister di Infrastructura a reuni cu Infra team pa trata planifacion di trabounan di asfalt pa aña 2019 – 2020. Gobierno ta hiba un maneho den cual ta enfoca riba e ser humano, y den cuadro di esaki a tuma e decision pa percura pa asfalta camindanan di tera den barionan rond Aruba cu ta forma entre otro peliger pa salud di hende y drecha camindanan den mal estado. Tur esaki a base tin criterianan y lista di prioridad.

 

* Minister di Infrastructura a anuncia e siman aki cu e proyecto di hotel na San Nicolas finalmente a cumpli cu tur exigencia y a drenta fase final pa su realisacion. E traspaso di tereno a tuma luga na notario. Despues di esaki den sala di Conseho di Minister, a tuma luga presentacion di Three Rivers Real Estate, unda a intercambia di pensamento cu Prome Minister hunto cu coleganan Minister di Turismo, Minister di Labor y Minister di Husticia. Dia siguiente 

miembronan di prensa a ricibi informacion di e proyecto directamente for di e desaroyadornan y a haya oportunidad pa haci pregunta.

 

* Preparacionnan ta andando y trabou duro ta tumando luga pa realisacion di apertura di Aruba su Upcycle Center. Dunando personanan alternativa pa deposita articulonan cu ya nan no ta uza na e ‘Upcycle Center’ pa e productonan aki por ricibi un otro ‘bida’ prome cu deshaci di nan.

Sigur un di e metanan di e centro di reciclahe aki ta cu kier logra pa ciudadanonan realisa cu nos TUR tin un responsabilidad global pa e forma con nos ta atende cu desperdicio. Y hunto nos por yega na tin un Aruba cu ta consciente di nos impacto riba planeta.

 

* Na cuminsamento di luna a bishita e ruina di edificio cu ta ex EPB / Martin Luther King School (San Nicolas). Un edificio bandona pa mas cu un decada caba, formando un molester pa e bisindario. Aworaki por mira esnan di DOW haciendo e tereno limpi, pa despues evalua e posibilidadnan cu e tereno ta brinda. Den e proximo simannan e bario lo nota mas trabou tumando luga den cuadro di e limpiesa aki. Habitantenan den cercania sigur ta contento di mira cu algo ta wordo haci cu e ruina aki. 

 

* Minister di Enseñansa a firma un MoU cu Wayne State College, cu ta garantisa cu nos studiantenan cu Arubalening por studia na un prijs hopi accesibel na e prestigioso universidad aki na Nebrasca, Merca.

 

* Minister di Enseñansa a anuncia cu tin posibilidad pa nos studiante cu ta studia na Universidad na Aruba of IPA, por aplica pa un beurs for di e Stimuleringsfonds. Loke bo mester haci ta download e formulario for di website di Departamento di Enseñansa y aplica pa e beurs aki. 

 

* Minister di Enseñansa hunto cu Minister di Salubridad y Minister di Labor a firma e MoU cu AHLEI cu lo certifica na e nivel mas halto trahadonan den sector di turismo via EPI. E prome curso pa eleva calidad di servicio a wordo ehecuta den siman aki. 

 

* Ministerio di Turismo, Salud Publico y Deporte conhuntamente cu Departamento di Salud Publico a haci un bishita na nos hendenan cu ta rekeri un cuido special na Corsou. E bishita aki tabata tin como meta pa haci un control riba e cuido ofreci na nos Arubianonan. Tambe a logra haci diferente palabracionnan relaciona cu pago y di control riba un manera periodico di e calidad di cuido ofreci. Di e manera aki Gobierno ta desea di crea un relacion estrecho cu e instancianan aki y tin mas contacto cu nos hendenan cu desde prome cu Status Aparte ta interna. E initiativa aki ta demostra cu un bon calidad di cuido pa nos hendenan ta prioridad pa Minister di Salubridad.

 

* Minister di Turismo a haci apertura di e conferencia di turismo ATCA 2019. Un conferencia sumamente exitoso pa nos turismo caminda Minister President tambe tawata tey pa asina mustra sosten na nos turismo cu ta nos unico pilar economico. E importancia pa e conferencia aki ta grandi considerando cu e conferencia aki ta dirigi na prome y segundo mercado cu ta Merca y Canada.

 

* Minister di Turismo a entrega certificado di Aruba Certification Program na Caribbean Palm Village y La Cabana Beach Resort and Casino. Un pabien na tur empleado di ambos hotel cu a sigui e e curso di certification cu ta sumamente importante pa mantene nos nivel di servicio hopi halto.

 

* Na colegio EPI a tuma luga e “huramentacion” di 121 graduado di sector welzijn. Minister di Salubridad tawata presente y a huramenta cada un di e 121 graduadonan. Sigur hopi importante teniendo cuenta cu nos tin un escases enorme den e profesion aki di enfermero y enfermeranan. Ta e intencion pa nos percura pa brinda oportunidad di trabou pa tur e graduadonan aki y ya caba nos a pone tur e instancianan na altura pa asina yuda nos brinda un miho servicio y cuido medico.

 

* Minister di Cultura a celebra Dia di San Juan ‘Dera Gay’ na Plaza Status Aparte na Santa Cruz diadomingo, y dialuna hunto cu coleganan di Departamento di Cultura y su Ministerio a bishita chikito y grandi pa promove e fiesta tradicional. Tambe e Minister a bishita Prinses Amalia Basisschool na Playa y a pasa un rato ameno cu e muchanan. Minister Ruiz-Maduro a entrega e buki ‘Shon Wantomba y e celebracion di Dia di San Juan’ na e muchanan pa asina nan ta bon informa tocante di nos fiesta tradicional ‘Dera Gay’. Despues e Minister a dedica atencion na nos grandinan y a pasa bishita nos grandinan di Cas Marie y disfruta un rato di e fiesta tradicional hunto cu nan. Mas atardi Minister Ruiz-Maduro a haci un recorido den varios bario di Aruba cu tabatin celebracion di ‘Dera Gay’ y asina biba nos cultura cu nos pueblo.

Tambe Minister Ruiz-Maduro a gradici tur comision organisado pa nan cooperacion pa organisa e actividadnan di e fiesta di Dia di San Juan ‘Dera Gay’.

 

* Na Centro di Bario Brazil Minister di Cultura a gradici Sr. Chico Harms pa mantene nos cultura bibo y a duna un reconocemento di Departamento di Cultura na Sr. Chico Harms pa su continuo aporte na e celebracion di Dia di San Juan.

 

* Minister Ruiz-Maduro a splica e contenido di e carta cu a contesta CAFT, den cual e ta contra aresta e ponencianan di CAFT cu Gobierno di Aruba no a brinda suficiente informacion y no a sigui recomendacionnan di CAFT riba norma di personal, e plan integral di e reforma fiscal y e gastonan di AZV. E Minister a informa cu CAFT tabata debidamente informa tocante esakinan, ya cu CAFT a atende varios reunion gobernamental y tecnico y Gobierno tambe a manda 4 carta na CAFT den cual a brinda tur informacion. Tambe Minister Ruiz-Maduro a splica cu Gobierno ta mantene na e normanan di e protocol firma entre Gobierno di Aruba y Hulanda na november 2018 y cu no tin ningun base legal pa un ‘aanwijzing’. E Minister a enfatisa cu tanto CAFT y e como Minister di Finansa mester funciona denter di e autoridad cu e Ley ta brinda cada un di nan pa asina por logra saca pais Aruba for di e situacion financiero precaurio. 

 

* Minister di Cultura a presenta e publicacion oficial di e documentacion di nos pilarnan cultural. Un buki conmemorativo cu ta describi historia di 30 persona of organisacionnan cultural cu a celebra un of mas lustro den 2018. E Minister a brinda e prome bukinan na Minister President sra. Evelyn Wever-Croes y tambe na ex Minister di Cultura sr. Ramon Lee kende bou di su auspicio a inicia cu e documentacion di e buki na aña 2008, tambe a otorga un ehemplar na nos tata di Cultura, sr. Padu Lampe. 

 

* Minister di Transporte ta supervisando di cerca e proceso pa e busnan nobo di Arubus yega Aruba pronto, pa di e manera aki por cuminsa renoba e flota. Di e manera aki ta sigurando cu nos compania estatal di transporte, Arubus NV, lo sigui funciona pero di un manera optimo y cumpliendo cu e demanda y deseo di su usuarionan. 

 

* Minister di Transporte, Comunicacion y Sector Primario a logra pa Aruba bira hub regional oficial di Servicio Postal pa e area di Caribe. E hub aki lo nifica cu tur post di Caribe lo pasa via Aruba y for di nos pais esakinan lo wordo distribui pa e otro islanan den Caribe, y kisas tambe pa e paisnan di Latino America mas cercano.

 

* Minister di Asuntonan Social a ricibi for di man di Parlamentario Edgar Vrolijk e programa anual pa loke lo bira e Centro di Bario Santa Cruz cu ta conta cu e compromiso y apoyo di e Mandatario

 

* E proyecto di “Riba Caminda pa Trabou” ta dirigi specialmente riba e reintegracion di mamanan soltera den mercado laboral. Un programa cu ta resultando exitoso en vista cu e grupo di mamanan soltera ya caba ta hayando oferta pa trabou y ta logrando di yega nan meta di por ehempel caba nan scol exitosamente. Participantenan a vocifera di ta cla y motiva pa subi mercado laboral.

 

* Minister Glenbert Croes a reuni cu Departamento di Finansas pa yega na un presupuesto husto y balansa pa Ministerio di Asunto Social y Labor sin cu e ta sacrifica ningun servicio, ayudo y apoyo na nos causa social y laboral. Pero cu na mes momento ta cumpli cu e norma- y exigencianan palabra, pa hunto nos logra rescata nos Pais y pone Aruba bek firme riba su propio pianan financieramente.

 

* Proyecto di DPL pa asisti Aruba Aloe Balm cu e proceso di adkisicion di trahadonan local a resulta exito rotundo. DPL ta demostrando di lo bira e unico partner di e esun cu ta buscando empleo pa yega na un trabou cu ta respeta e derecho laboral di e trahado.

 

* Grupo 12 di SVT/Formacion Social yegando su fase di culminacion pa despues nos hobennan cuminsa cu nan pasantia den sector priva.

 

* Minister Glenbert Croes a bishita e exposicion di arte organisa pa CEDES cu ta un instancia cu ta duna guia, cuido y educacion na nos muchanan special. Impresiona cu e fantasia y talento di nos muchanan special.

 

* Na Geneve, durante e Conferencia di International Labour Organization ILO, Minister Glenbert Croes a marca historia como e prome Minister di Labor di Aruba cu a tene un discurso durante e Conferencia y den nomber di Reino Hulandes, riba e mesun tarima unda Presidente di Alemania, Francia y otro Paisnan tambe a dirigi nan mes na e mas di 187 paisnan miembro y participante den e Conferencia aki.

 

* Durante e Conferencia di ILO, e delegacion di Aruba y di Corsou encabesa pa e respectivo Ministernan di ambos Pais, a reuni cu Sr. Patrick Belser cu ta e specialista di ILO riba salario minimo.

 

* Tambe ambos delegacion a reuni cu Sr. Joaquim Pintado Nunes cu ta e representante oficial di ILO cu specialismo riba salud y siguridad na pia di trabou, na Aruba conoci como ARBO.

 

* E delegacion di Aruba y Corsou ambos bou direccion di respectivamente Minister Glenbert Croes y su homologo Sr. Hensley Koeijmans a reuni cu Nick Grisewood, Heloise Ruaudel y Fabiola Mieres di ILO riba e topico di migracion laboral.

 

* Minister Glenbert Croes a presencia e discursonan di Presidente di Alemania Sra. Angela Merkel, Sr. Emanuel Macron cu ta Presidente di Francia como tambe di Sr. Dimitri Medvedev cu ta e Prome Minister di Rusia.

 

* Ambos Minister di Aruba y Corsou a reuni cu IOM, UNHCR y ILO riba e crisis migratorio di Venezuela.

 

* Riba entre otro e mesun topico aki ambos Minister a reuni tambe cu Sr. Juan Hunt cu ta e Director General di ILO – AMERICAS. Otro topiconan discuti durante e encuentro aki tabata proteccion social, creacion di empleo y oportunidadnan di trabou.

 

* Minister Glenbert Croes a reuni cu Sr. Colin Jordan kende ta e Minister di Labor di Barbados. Ambos Minister a explora e posibilidad di traha hunto.

 

* Durante e conferencia di ILO tambe e mandatario di Aruba a reuni cu Sra. Zulphy Santamaria Guerero, Minister di Labor di Panama durante cual tambe a palabra di lo explora e posibilidadnan con ambos Pais por comparti y siña di experiencia di otro.

 

* Un otro homologo cu Minister Glenbert Croes a reuni cu ne ta Sra. Jennifer Baptiste – Primus, kende ta mandatario di Trinidad and Tobago. E pais aki tambe ta enfrentando e crisis migratorio di Venezuela. Hunto a discuti riba diferente topico y a keda palabra cu lo continua den contacto pa evalua un posibel cooperacion.

 

* Minister Glenbert Croes a percura pa e personal di su bureau y algun funcionario di DPL, sigui e curso di Office Skills na Enseñansa pa Empleo. Tabata un grato noticia ora cu e docente Sra. Laureen Eman a informa cu tur hende, sin excepcion, a pasa e examen final cu exito. Un pabien na tur.

 

* Minister Glenbert Croes a reuni cu Stichting Thuiszorg Aruba ofreciendo tur apoyo y cooperacion na e Fundacion cu tin un tarea asina importante den duna cuido y apoyo na nos grandinan y esunnan cu un of otro incapacidad fisico

 

* Unicef ta na Aruba asistiendo Gobierno den e proceso di e di dos raportahe pa loke ta e Crisisplan Social.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: