Konkurso di skirbi pa konmemorá: ‘Dia Internashonal pa rekordá ruta transatlántiko di sklabitut i su abolishon’

Konkurso di skirbi pa konmemorá: ‘Dia Internashonal pa rekordá ruta transatlántiko di
sklabitut i su abolishon’
Willemstad – Dia 23 ougùstùs ta dia internashonal pa rekordá ruta transatlántiko di sklabitut i
su abolishon. E kurashi di e hende muhé i hòmber ku a lucha pa abolishon di sklabitut ta obligá nos duna
nan e honor meresí pa a aportá pa awor nos ta liber. Komishon Nashonal di UNESCO Curaçao,
Fundashon NAAM, Plataforma di Sklabitut i Herensia di Sklabitut, Fundashon Biblioteka Nashonal
Kòrsou, Fundashon Kas di Kultura huntu ku Ministerio di Enseñansa, Siensia, Kultura & Deporte ku
koperashon di Sektor di Kultura & Deporte ta organisá un konkurso di skirbi titulá: ‘Bibando ku
Libertat’.
Partisipantenan lo mester bai reflehá riba e lidernan di e rebelionnan ku Kòrsou a
konosé. E balornan ku nan a karga durante e lucha òf kon e lidernan lo a eksperensiá e Kòrsou
di awendia. Kiko ta nifiká ta liber? Nos ta Igual? Kiko lo tabata Tula, Bastian Karpata òf Sablika
su opinion? Kon nos ta atendé awendia ku e balornan libertat, igualdat i fraternidat? Nan lo ta
orguyoso di nos?
Reglanan di partisipashon Bibando ku Libertat:
E kompetensia ta konsistí di dos kategoria; kuenta kòrtiku i poema. Tur personanan di 18 aña
bai ariba ku ta biba na Kòrsou por partisipá. Tur kuenta òf poema mester trata e tema bibando
ku libertat saliendo for di e konteksto di abolishon di sklabitut i e ruta transatlántiko. Tur teksto
mester ta na Papiamentu i original. E kuenta kòrtiku mester tin máksimo 750 palabra i poema
no mas largu ku 32 liña. Por entregá teksto mas tardá 11 di ougùstùs via email:
bibandokulibertat@gmail.com.
Premio:
E ganadónan máksimo di kada kategoria lo por partisipá grátis na e konkurso di skirbi di
Wintertuin Curaçao na sèptèmber próksimo. E di dos finalista di kada kategoria lo risibí un
Lenovo tab E7. E 3 mihó tekstonan di kada kategoria lo keda presentá durante e programa di 23
di ougùstùs na Biblioteka Nashonal Kòrsou. E 10 mihó tekstonan di kada kategoria lo keda
publiká.
Publikashon ganadó:
Dia 17 di ougùstùs lo anunsiá e 10 mihó tekstonan. Durante di e programa di konmemorashon
riba dia 23 di ougùstùs lo saka e ganadó máksimo.
Chèk página di facebook di e organisadónan pa sobra reglanan di partisipashon. Pa kualke
pregunta òf mas informashon por tuma kontakto ku Nifa Ansano via whatsapp 694 7587 òf
bibandokulibertat@gmail.com.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: