Pa Minister Camelia-Römer i PIN, salú di hende ta na promé lugá
Pa Minister Camelia-Römer i PIN, salú di hende ta na promé lugá
Mientras ta krea i inventá delaster un diskushon riba diferente aspekto di e proyekto di konstrukshon di un hospital nobo pa Kòrsou, ku a start for di 2009, kada dia ku pasa sin Kòrsou tin un hospital ku ta kumpli ku eksigensianan di kalidat di kuido hospitalario, ta un dia pèrdí. Manera e Minister di Salú a splika ampliamente e siman aki durante un rueda di prensa, mester bòltu delaster un pieda i investigá tur desishonnan ku a ser tumá na inisio di e proyekto pa konstrukshon di hospital. Mientras tantu, sra. Camelia-Römer i su tim di profeshonalnan eksperienshá Yu di Kòrsou, no ta spar ningun esfuerso pa Kòrsou tin su hospital nobo prome ku fin di aña.
Partido Inovashon Nashonal (PIN) ta tumando nota di e tantisimo intentonan pa logra ku e komunidat aki ta lubidá desishonnan di gobièrnunan di turno i akshonnan hopi baho pa demonisá esnan ku hustamente ta hasiendo visibel resultadonan desfaborabel di desishonnan di pasado. Sinembargo, PIN ta sostené e perseveransha di e minister pa logra ku mas pronto posibel Kòrsou tin un servisio hospitalario ku e meresé. Huntu ku esei, e minister di PIN den e aktual kabinete, a sòru tambe pa dil ku e retonan di gastunan innesesario di remedi, speshalistanan i mandamentu di pashènt den eksterior.
Mientras otronan ta kalumniá i hinka tur nan energia pa e proyekto hospitalario frakasá, e tenesidat di sra. Camelia-Römer ta dirigí inkansablemente riba aliviá esnan ku ta sufri pa motibu di falta di servisionan hospitalario i famianan ku ta kore riesgo di pèrdè nan sernan kerí pa e motibu ei. Na mes momentu, sra. Camelia-Römer a sa di duna oïdo na trahadónan di Sehos i nan sindikatonan, pa sigurá ku esakinan ta bon prepare pa sigui duna bon servisio den un ambiente moderno i ekipá ku tur lokual mèdikonan, verpleegster i brudernan mester pa por hasi lokual ta nan vokashon.
Partido PIN ta rekonosé forsa di un mandatario ku, bou di sirkumstanshanan difisil manera esnan ku Kòrsou ta pasando aden, sa di keda para fuerte ku enfoke riba e meta final, den e kaso aki: salú di hende. P’esei tambe PIN ta orguyoso di e desishon di gobièrnu pa hasi otro intento pa aserká Hulanda pa un fiansa un tiki mas faborabel, pero sin ku esaki ta trese mas retraso i gastu pa e proyekto di konstrukshon di hospital. Pa PIN, ta e mayoria silensioso ku sa kuantu su salú i bida bal ta konta. Esnan ku nesesidat di kibra i krea disunion, na final di dia lo haña e kuenta presentá.
PIN un biaha mas ta suprayá ku tin un forsa ku na e momentunan aki den nos historia a sòru pa tin un Minister di Salú ku por dil ku asuntunan kompliká i goberná. PIN ta insist ku mester aselerá e investigashon independiente di Kontrolaria General mientras Parlamentu mester hasi bon uzo di su poder pa un enkuesta parlamentario klarifiká henter de trayekto pa yega na un hospital nobo.
