Disertashon Rueda di Prensa.

 

 

Introdukshon: PAR no ta aki pa motibu di insulto di Silvania na Trona.

Na promé lugá, mi tin ku kuminsa na splika ku PAR no ta sinta aki paso nos ke kabes di Silvania pa motibu ku el a insultá un ambtenaar. Ku Silvania tin kustumber di insultá profeshonal ta un echo.

Historia di Silvania di maltrato na profeshonal/ambtenaar

1. Nos ta papiando di e Minister ku mester a pidi despensa publikamente 2 biaha na sra Maria Liberia Peters den augustus aki paso el a insulta e señora. Despues el a bise ku e no tin nada di duna opinion riba politika.

 

2. 17 februari 2022, dos Polis, beveiliger di Minister Silvania ta pone trabou abou. Nan a bisa ku nan ta kansá di e forma humiyante ku Minister ta papia ku nan. Prome ku nan, Chauffeur a nenga di traha pa Minister A bini un investigashon dor di Pisas i kaso a bai doofpot te awe!

 

3. Februari 2022 Minister Silvania ta insulta i purba kore ku Jamila Isenia, profeshonal hefe di Inspectie di Belasting. Ta PNP a pare.

 

4. November 2022 trahadonan di Ministerio di Finansa ta pidi Minister pa stop di publika kos riba su Facebook ku ta pone pueblo lanta kontra nan. Paso Minister ta akusa nan I nan no por defende nan Sindikato a Sali defende nan. Minister di: niun hende no ta bisami no publika riba Facebook.

 

5. 18 April 2022, Silvania ta humiya su kolega Minister Cijntje den Parlamento p’e hasi politika manera ku ta e so ta Ku Cijntje sinta einan banda di dje. Mester a schors reunion pa 3 ora pa partidonan bai diskuti te ora Silvania pidi diskulpa. Reunion a reanuda I Silvania bou di preshon a pidi Minister Cijntje diskulpa publikamente dilanti Parlamento.

 

6. Tin e kaso di Gisette Seferina. Profeshonal ku Minister a konspirá pa manda BPD a investigá I a konkluí ku e sra no a hasi nada robes I tin ku bai trabou bèk. Te awe Silvania tin n’e na kas. Simplemente paso e ta di otro kolo politiko.

 

7. Direktor Mediko di CMC a kroe bai, direktor finansiero a kore bai, spesialistanan a kore bai I nenga di bini pa motibu di Silvania.

 

 

Esaki ta djis algun kaso promé ku e kaso di Trona! Anto tin varios mas. Pues ta Silvania su kustumber di humiyá I terorisá profeshonalnan ku no ke hasi loke e ke, of papia loke e ke tende.

Mi ta kontentu ku sindikatonan a sali ayera kontra e habusu sistematiko di nos profeshonalnan. Paso tin or abo ta sinti ku “bos di buriku no ta yega Shelu”.

Porfin nan a uni paso berdat ta basta. E terorismo kontra nos profeshonalnan ta destrui e aparato. Tur hende tin miedu di Silvania. Si bo NO ta su fanatiko, e ta tuma represaya konmtra bo. Aparato Públiko No ta imparsial mas!

 

 

Pueblo a disidí ku e komportashon ei ta loke e KE.

Pero di otro banda maske ami ta hañ e komportashon ei grave, 55% di nos komunidat no ta haña esei. Bon a bira malu i malu a bira bon. Paso apesar di esaki 18.000 hende eifo a disidi ku e komportashon ei ta bon. 18.000 hende a

 

skohe demokratikamente ku ta e komportashon ei nan ke di un Minister. Pueblo a skohe.

Pues Pueblo tin e gobiernu ku el a skohe I ta haña e komportashon ku el a skohe. Komo Parlamentario pues, “kore ku Silvania/Mate politikamente” no ta mi meta. Mi ke respèt pa nos profeshonalnan I nos demokrasia si.

Awe nos ta enfrentando un krisis ku ta un test pa nos demokrasia.

E motibu ku PAR ta sinta aki awe, ta ku nos ta enfrentando un situashon insolito ku ta afektando integridat di nos demokrasia I gobernashon.

Pa di promé biaha, un profeshonal a habri su boka i a para intimidashon di un Minister di e forma aki. El a pidi publikamente dispensashon p’e papia I a deklará ku “si e papia ku OM Silvania no por keda Minister”! Esaki ta nifika ku publikamente e ambtenar di mas haltu di Financien a deklara ku e tin prueba ku Minister di Finansa a komete echonan kastigabel. Ta algu nunka bisto den nos historia demokratiko kòrtiku. Ta un echo ku ta pone un preshon enorme riba integridat di nos pais i riba funshonamentu di nos demokrasia. Ta un prueba ku historia ta presenta nos dilanti i esaki ta muchu mas grandi ku “insultá un ambtenaar”.

Esei ta e motibu ku PAR ta sintá aki.

Kiko awor?

Tin algun kos ku tin ku sosode. Permitimi kuminsa ku e petishon di Ontvanger. Ontvanger no tin mester di niun “toestemming” p’e bai Ministerio Publiko i duna informashon di echo kastigabel ku el a tuma nota di dje.

(OM) Pues si Ministerio Públiko NO a yama sr Trona for di den weekend pa tuma tur prueba serka dje di echonan kastigabel kometé dor di e Minister, mi no sa mas kiko tin di sosodé den e pais aki.

Algun siman pasa m’a deklará ku OM tin un rol di vigila demokrasia di nos pais i ku Pueblo NO ta sinti ku OM ta tuma e tarea aki na serio. NO ta prome

 

indikashon di korupshon ku pueblo no ta tende nèt nèt nada di dje. Kaso CPR, kaso ENNIA, eksonerashon di Belasting ku Kontraloria General a deklará ku ta ilegal, tur ta kasonan ku tin keho entregá I pueblo tin años sin tende nèt nèt nada di OM. Den kaso di CPR tin rapòrt forensiko entregá. Aña 2022! 3 aña pasá! Keho di Banko Sentral. Mi mes a lesa rapportnan i a mira prueba di falsifikashon I tambe KEN a komete falsifikashon. Unda OM ta awe 3 aña despues?

No ta prome biaha ku Trona ta bisa OM ku e ke papia. Kiko OM a hasi ku esaki den pasado?

Ami no por determina si tin korupshon den un kaso. Korte ta hasi esei. Pero Korte no por hasi e trabou si OM no persigi i investigá. ESEI ta Trias Politica. Esei ta un estado di derecho demokratiko. TUR aktor tin ku tuma nan ròl I mustra komunidat ku nan ta hasie.

“Justice must not only be done, it must also be seen to be done”.

Komunidat mester mira ku Hustisia ta wordu hasi I OM ta fayando den esaki años kaba, dor di keda ketu. Si OM NO tuma e kaso aki na serio I skucha Trona, nos por doek op nos demokrasia. Mi NO ta akusa Silvania di korupshon. Mi no por, mi no a mira prueba. Ami NO tin indikashon di esei.

Pues lo mi NO akusa Silvania. Pero e ambtenaar di finansa di mas haltu di pais si a bisa esei. Ami a deklara varios biaha di tin konfiansa den OM. Te ainda mi tin n’e, maske e konfiansa ta bezig ta bahando tiki tiki. Mi ta sinsero. OM, Ban pa Bai! Tuma bo ròl na serio.

Reino.

Ami NO ta interesa pa bai Reino. Nos mes tin nos responsabilidat. Ban demostrá ku nos mes por asumi nos responsabilidat.

Boso no ta kere Reino ta mira? Boso no ta kere ku Politika Hulandes tei kuminsa falta nos respèt? Paso ta nos mes ta duna nan chèns, dor di NO

 

atende seriamente ku nos demokrasia. Ban demostrá ku nos demokrasia ta na bida. Esaki t’e momentu.

 

 

Dispensashon na Trona.

Lagami sidi ku e dispensashon di Ontvanger. Manera sr Trona a pone den su komunikado I ami a publiká riba retnan sosial, art 50 di ALL I 62 di ALM ta mustra ku un ambtenaar mester di òutorisashon di su superior p’e por divulgá echos ku e sa pa motibu di su trabou I ku e mester tin sekresia. Kemen e ambtenaar no por defende su mes.

Minister a deklará den su video emoshonal, ku ta Trona ta strobé pa ehekuta su maneho transparente pa kobra hende riku Belasting. Mi ta bin bèk riba esei, paso ban serio, ta ken a eksonerá 3.2 Bion na komersiantenan mionario? Ta Trona?

Pero dikon Trona mester di eksonerashon I ken por dune esei? Parlamento por dune? Trona mester di dispensashon p’e por komparti detaye I defende sum es dilanti Parlamento. No di e insultonan di e Mi nister, paso nos tur por a skucha ku Trona tambe por zundra bèk, Pero Trona no por defende su mes dilanti Parlamento di e akusashon ku e ta tuma sèn bou di mesa I ku e ta stroba maneho di Minister. P’e por hasi esaki e tin ku papia sekreto di su trabou ku Parlamento. Anto e TA nesesario. Parlamento tin deklarashon di Minister ku Trona ta strobe su maneho ku Parlamento a aproba. Ta nos tarea di kontrola esaki. Parlamento por duna dispensashon na Trona? Nò. E úniko 2 Ministernan ku por, ta Minister Silvania mes I Minister di BPD, segun LMA.

Silvania NO ta bai duna Trona dispensashon. Ta e a akusa Trona den su video, sabiendo ku Trona NO por defende su mes. E pregunta ta, kiko MinBPD ta bai hasi? Di aki, PAR ta pidi Minister BPD pa den kuadro di nos demokrasia I pa Parlamento por hasi su trabou, por fabor duna Trona dispensashon p’e papia! Paso nos tur sa ku e kaso aki ta grave I historia ta mira nos.

 

Awor ta bini e tarea di Parlamento.

 

 

Direktiva di MFK.

Pero un hende lo puntra, dikon tin ku bai Parlamento si direktiva di Partido MFK a saka un komunikado kaba, bisando ku “duna nan tempu pa atende e kos aki internamente”? mester por duna nan tempu tòg? Esei no ta korekto?

Nò! E posishon ei ta peligroso I anti demokratiko asta!

Ki direktiva di MFK tin di haber ku e akusashon di echo kastigabel kontra Silvania? Direktiva di MFK ta hues? Nan ta OM? No!

Direktiva di MFK por kontrola e maneho di e Minister? Ku kua òutoridat? Nan por pidi Trona informashon sekreto pa nan evaluá si loke Minister ta bisa ta bèrdat? Nò! Mi ta atvertí pa wak mi no skucha ku direktiva di MFK a risibi informashon ku Parlamento di Kordou no a risibi. Simplemente no POR! Esaki ta mina nos demokrasia.

Úniko kos ku direktiva di partido por hasi, ta tuma medida disiplinario paso e Minister ta insulta profeshonalnan kada biaha ku e tin gana I simplemente e no ta tende di niun hende. Si nan ta konsiente ku e Minister ta presenta un imahen di defensor di Pueblo, siendo e ta manipulá pueblo pa medio di su video, p’e sigi habusa di su poder I kibra e imahen di MFK di “ku Pueblo I pa Pueblo”, nan por atende disiplinariamente ku n’e I asta bahé. Esei por.

Pero despues di e karta di Trona I e posishon di sindikatonan, e kos aki a sali for di outoridat di direktiva di MFK. No ta simple un zundramentu ku konsekuensia disiplinario. Ta trata integridat di gobernashon I maneho di pais i esei ta tarea di Parlamento di Kòrsou, NO direktiva di MFK.

Pues maske mi ta aploudí e komunikado ku direktiva di MFk ta tuma e asuntu na serio, e por ta simlpemente un “rèkmentu di kakiña” pa proteha Silvania I

 

sòru pa e kaso aki muri un morto silensioso I nunka yega Ministerio Publiko, ni komunidat. Anto esei ta peligroso.

Kemen nò! No por bini “mediastilte” tanten MFK ta atende internamente. No por keda sin yama reunion urgente paso direktiva di MFK ta bezig. Aki no ta trata di “direktiva di MFK” su problema mas, ta trata di integridat di demokrasia di pais I esei ta tarea di Parlalemto I OM.

Presidente di Parlamento

Pues ta bai un yamada na Presidente di Parlamento, pa yama e reunion ku karakter di urgensia pidí pa oposishon I no sinta warda direktiva di MFK. Abo ta representante di Pueblo, direktiva di MFK no!

 

 

Parlamento su tarea.

Ora e kaso yega Parlamento, Parlamento por huzga a base di e berdat ku Trona I Minister papia, pa mara konsekuensia politiko na:

1. E maneho di habusa di profeshonal kritiko di Minister Silvania
2. E maneho di Trona ku segun Silvania ta strobe di hiba un maneho transparente
3. Fiha un posishon kiko ta sosode ku e akusashonnan di Trona pa ku Silvania I Silvania pa ku Trona

Einan pueblo por determina si Parlamento (su representante skohí direktamente), ta funshoná si of no. Einan parlamentarionan por demostra si nan tei pa defende pueblo, of ku nan tin danki di duna na Silvania/Partido. Ei parlamentarionan por demostra ku nan ta defende interes di pais I no di Partido. Ei pueblo por husga. Ora Trona papia.

Manupilashon di Silvania den media.

 

Paso Silvania ta papiando kaba. Silvania ta hibando un “strategia di media formal” pa krea un bon imahen. Tur stratega di komunikashon di Silvania ta trahando overtime.

Diripiente ta e ta “defensor di Pueblo” i tur ku ta kuestioné ta “mata ke maté”. Esei ta krea un “imahen di martir”. Nos ta yama esei Manipulá.

Video ku musika konmovedor, akusando Trona. Kiko si e NO ta hasiendo? Laga Trona defende sum es. Papia ku Prensa ku por hasie pregunta kritiko. Esei e NO ta hasi, aso einan ta bora dor di su “show”. Silvania mestero wordu nomina pa Oscar e aña aki.

“Promé ku matami, lagami subi AOV”: Pero bo tabatin 5 aña pa subi AOV bo NO a hasie. Awork u bo ta den problema diripiente bo tin ku keda pa hasie? (No ta asina fanatikona di Silvania ta bisa PAR?

Silvania tabatin e deber legal di indeksá AOV. E NO a hasie. El a risibi 18000 voto I 13 asiento I na luga di hisa AOV (ta 1 Lb ku ta Minister SO por firma) el a bai un show di dialogo pa hasi manera e ta hasiendo algu. Silvania por a indeksa AOV ayera! Dikon e no a hasie? Paso e no KE! Kemen basta ku manipula.

“Tur florin ku keda sin wordu kobrá di e riku, ta strobe AOV di subi, anto Trona no ta kobra e riku”.

Manipulashon. Ta Trona a eksonera Banko Mionario lokal 3 mion? Ta Trona a eksonera sponserdi MFK 6 mion? Ta Trona a eksonera 3.2 bion di belasting sin base legal? Unda Silvania su “deseo pa kobra delaster un florin” pa MaYeYe tabata e dia ei?

Anto te awe ta kobra e hòmber chiki si OZB ku otro belasting?

Esei no ta Trona. Ta Silvania. Silvania no ta un martir ku ta lucha p’e pueblo, Silvania ta un politiko ku ta usa emoshon di e pueblo pa e keda na poder! Anto e ta destrui tur (asta profeshonalnan) ku no ta sirbi SU interes politiko.

 

Laga Trona papia i laga demokrasia funshoná.

Si Silvania ke ta transparente, lage laga Trona papia. Duna Trona dispensashon p’e papia liber ku Parlamento anto e dia ei Pueblo ta sa kiko ta berdat.

Bala ta den man di OM i Presidente di Parlamento. Ban wak si demokrasia di Kòrsou ta bibu, òf (fanatikonan di) Silvania tin demokrasia dominá.