E proyekto piloto “Homeschooling” ta kontinuá den aña eskolar 2019/2020.

Willemstad- Tur mucha tin derechi riba enseñansa. E derecho aki ta ankrá den e tratado internashonal di derechi di mucha artikulo 28, i alabes ta ankrá den nos lei di enseñansa obligatorio: “LANDSVERORDENING van de 19de juli 1991 houdende bepalingen tot regeling van de leerplicht, título ku ta sita: Leerplichtlandsverordening”.

Tur mucha den e edat di 4 pa 18 aña tin derechi riba enseñansa i esaki ta nifiká ku tur mucha mester ta inskribí komo alumno na un skol i mester akudí na e lèsnan na e skol. E obligashon aki ta konta te ora e hoben kumpli 18 aña o te ora e hoben risibí un kalifikashon (startkwalificatie).

Por sosodé sinembargo ku un hoben tin malesa króniko sea mental o físiko ku ta imposibilitá su asistensia na skol. Mayornan por pidi dispensashon pa e yu no bai skol. Alabes por sosodé ku mayornan tin opheshon fundamental kontra di e direkshon (religion/denominashon) di e skolnan na Kòrsou kaminda e hóben lo por sigui lès. Den e kaso aki tambe mayornan por pidi dispensashon pa e yu no bai skol i tin ku demostrá ku e yu(nan) tin otro forma pa risibí sufisiente enseñansa.

Pa 2018/2019 Gobièrnu a kuminsá ku un proyekto piloto “Homeschooling Curacao” ku un kategoria mas, speshalmente pa e muchanan ku di un of otro forma no ta “fit” bon den e sistema di enseñansa regular ku ta keda ofresé dor di e skolnan aki na Kòrsou. Despues di evaluashon interno i evaluashon ku mayornan riba djamars, 13 di ougústus último, Ministerio di Enseñansa Siensia, Kultura & Deporte, ta kontinuá ku e proyekto di “Homeschooling” pa e siguiente aña eskolar, 2019-2020.

Riba fotonan athunto por tuma nota di reunion ku mayornan ku ta praktiká ‘Homeschooling’.

Minister Marilyn Alcalá-Wallé ta deseá na tur un aña eksitoso!!