E SEMI FINAL DI KOPA ABC TA TUMA LUGÁ, DJASABRA 24 DI OUGÙSTÙS NA ARUBA I KÒRSOU! VESTA LO TOPA REAL RINCON DEN SDK PA 8’OR DI ANOCHI!
E SEMI FINAL DI KOPA ABC TA TUMA LUGÁ, DJASABRA 24 DI OUGÙSTÙS NA ARUBA I KÒRSOU!
VESTA LO TOPA REAL RINCON DEN SDK PA 8’OR DI ANOCHI!
Tur kos ta kla pa e kampionnan di Kòrsou, S.V. Vesta topa e kampionnan di Boneiru, Real Rincon durante e partidonan di semi final di Kopa ABC 2019. E partido aki lo tuma lugá den Stadion Ergilio Hato pa 8’or di anochi. Na mes momentu e kampionnan di Aruba, RCA lo enfrentá Deportivo Nacional ku ta e sup kampionan di Aruba den Stadion C.D. Guillermo Prospero Trinidad aya na Aruba.
E partido di mañan lo bira unu sumamente interesante mirando ku e ekipo ganadó lo mester enfrentá e ganadó di Aruba durante e gran final di Kopa ABC 2019 ku ta tuma lugá dia 31 di ougùstùs òf promé di sèptèmber próksimo.
E ekipo di Vesta ta kla prepará pa e partido di mañan miéntras awe den oranan trempan di mainta e promé parti di e hungadónan di Real Rincon a yega Kòrsou pa sigui ku e preparashonnan pa e partido di mañan. Un tabla lo bula mañan anochi den SDK ora ku Vesta topa Real Rincon kara kara pa mira ta ken ta bai e gran final di Kopa ABC 2019!
Entrada pa e partido aki lo ta fl. 10,- pa adulto miéntras mucha di 6 te ku 12 aña i 60+ ta paga fl.5,-. Karchinan pa e partido aki ta optenibel na Feng Wei B.V. dilanti di e stadion di Vesta i mañan promé ku wega for di 2’or di mèrdia na e lokètnan di SDK.
FFK ta invitá hinter e pueblo di Kòrsou pa bin na bòshi bin apoyá, SV Vesta, e ekipo kampion di Liga MCB Promé Divishon ku lo enfrentá Real Rincon, e kampionnan di Boneiru durante e partidonan di semi-final di Kopa ABC 2019!
Nos ta topa djasabra, 24 di ougùstùs den Stadion Ergilio Hato!
23 ougùstùs 2019
