Partido nobo KEM ta para pa kambio

Partido nobo KEM ta para pa kambio

 

Willemstad – KEM ta un partido ku un idiologia Sosial Demokrat, Inovativo i progresivo. Nos ta para pa Libertat Igualdat Demokrasia i liderazgo ku lídernan hustu. P’esei nos ke informá ku e partido aki ta unu pa sirbi tur gremio, rasa i nivel sosial. Ta importante pa pueblo sa ku e hende di ménos rekurso i posibilidat pa oportunidat den nos komunidat ta haña tur nos atenshon i orientashon. Nos lo insistí pa esnan mas vulnerabel por mira un kambio den nan situashon di bida aktual. 

 

Nos metanan ta siña hende:

• mantené famia uní
• mantené balor propio
• traha un presupuesto
• traha ku un presupuesto limitá, evitando debe i spar pa

tempu difísil.

 

KEM ta un partido ku ke hiba un gobernashon LÓGIKO, kaminda gobièrnu i pueblo tin sufisiente konosementu pa respetá kontrolaria general di pais Kòrsou. Pa por logra esaki Partido KEM ta kere ku nos pais mester di trahadónan sosial speshalisá den diferente área pa drenta barionan i yuda pueblo ku su retonan sosial. Partido KEM ta kere ku mester parti Kòrsou den 7 distrito. Kada distrito lo tin un persona na kabes kual lo fungi komo persona di kontakto entre miembronan di su distrito i e minister konserní pa trata retonan òf situashonnan ku meresé atenshon.  

Partido KEM no ta kere den leinan bieu ku no ta adekuá pa 

tempunan moderno, nan mester wòrdu kambiá.  

Partido KEM ta para pa bin ku leinan ku ta kuadra den nos tempu moderno. Kambio di sierto leinan lo por eliminá opstákulonan pa asina invershonistanan por invertí den proyektonan ku por krea kuponan di trabou. Tambe lo propulsá bida sosio ekonómiko mihó pa yunan di tera.  

Mester bini un kambio den edukashon ku mester tin komo resultado mas oportunidat pa nos hendenan i konsekuentemente krea un komunidat ku ta duna servisio profeshonal den tur área. Mester bini un maneho ku ta duna tur siudadano ku ta òf kier hasi negoshi oportunidat pa risibí tur informashon i dokumentashon i tur petishon mester keda prosesá den un periodo rápido. 

Tur esaki mester redundá den un komunidat ku mas oportunidat kual lo resultá outomátikamente den redukshon di nos sifranan haltu di kriminalidat. 

 

Na promé lugá, nos lema LÓGIKO ta drei rondó di e palabra edukashon. Mester komprondé ku edukashon di nos hendenan lo nifiká tambe oportunidat di ta mas proaktivo, tin un balor propio mas grandi i moral haltu.

 

Den nos gobernashon LÓGIKO nos ke mira kambionan implementá den nos sistema di impuesto kaminda lo simplifiká esaki den diferente kategoria i hasié komprendibel pa tur hende. 

Partido KEM no ta kere ku ta pa medio di impuesto so por yena kaha di gobièrnu. Nos ta kere ku un redukshon di impuesto di entrada lo “boost” ekonomia dor ku e siudadano lo keda ku mas sèn den su saku pa kumpra mas kual lo benefisiá nos ekonomia.

 

Un sistema di impuesto mas hustu lo nifiká:

• pagadónan di impuesto responsabel 

• posibilidat pa bibienda pagabel di parti di gobièrnu òf

di parti di sektor privá pa hendenan di ménos rekurso.

 

Ta solamente si nos konsiderá e puntonan den e relato aki, nos por bisa ku nos ta logrando nos meta di un gobernashon LÓGIKO.

 

Partido KEM ta para firme pa traha huntu ku Ulanda. Nos ta kere ku a yega e momento pa benefisionan Hulandes mester por konta riba nos isla tambe. Pa logra tur esaki pueblo mester di hòmbernan i muhénan ku kurashi i determiná pa negoshá tur esaki ku Hulanda.

 

P’esei Partido KEM ta konvensí di tin e tim pa kambio.