Prome Minister Evelyn Wever-Croes Clausura training nacional pa preparacion pa orcan Hurrex2019 Pa prepara Aruba pa temporada di Horcan: RAMPENBESTRIJDING ARUBA TA CUMINSA CU CAMPAÑA DI CONSCIENTISACION
Prome Minister Evelyn Wever-Croes
Clausura training nacional pa preparacion pa orcan Hurrex2019
Pa prepara Aruba pa temporada di Horcan:
RAMPENBESTRIJDING ARUBA TA CUMINSA CU CAMPAÑA DI CONSCIENTISACION
E siman aki a tuma luga e training nacional pa preparacion pa orcan Hurrex2019. Temporada di Horcan a cuminsa na juni y ta dura te november. Mas miho nos prepara nos mes pa orcan, mas lihe nos por recupera despues di un orcan. Manera ta conoci Aruba ta un isla bendiciona y ta cay pafo di area di horcan pero esaki no ta kita cu mester prepara comunidad pa cualkier eventualidad relaciona cu Horcan y of mal tempo.
Siman pasa Prome Minister Evelyn Wever-Croes a reuni cu Bureau Rampenbestrijding Aruba (BRA) pa dialoga riba cierto puntonan di preparacion pa cu e temporada aki. BRA ta organisando un campaña di conscientisacion riba e tema di Horcan y preparacionnan necesario pa cu e temporada aki.
“E miho forma pa por bin bek despues di un calamidad ta con bon bo ta prepara prome cu e calamidad pasobra nunca por sa con fuerte e ta bin. Mi ta urgi e pueblo pa sigui e campaña di conscientisacion di Buraeu Rampenbestrijding Aruba. Sigui nan conseho y recomendacionnan facil con pa prepara pa esaki”, Prome Minister a enfatisa.
Aruba semper ta keda bon prepara y ta keda actualisa pa si acaso un horcan azota nos isla. Hurrex 2019 ta un training grandi di horcan pa asegura cu tur hende y departamentonan ta bon prepara. Palabracionnan ta cu si dado caso Aruba ta den peliger di horcan, e comision aki encabesa pa e Comandante di Brandweer lo ta esnan cu lo informa y alerta pueblo di e situacion na tempo pa asina tur hende por prepara na tempo.
“E training nacional pa preparacion pa orcan Hurrex2019 a wordo bon atendi. Den nomber di Gobierno di Aruba, mi ta pidi comunidad pa sigui e campaña di Rampenbestrijding Aruba, cuminsa prepara y no warda te na ultimo momento”, Prome Minister Evelyn Wever-Croes a enfatisa.