Reunion di komishon sentral pa trata proyekto di lei pa kambio di “Opiumlandsverordening” (Cannibas)

Willemstad, 16 di september 2019

 

Na: Presidente di Parlamento
Señor W. Millerson
Wilhelminaplein # 4
PRESENTE

Tópiko: Reunion di komishon sentral pa trata proyekto di lei pa kambio di “Opiumlandsverordening” (Cannibas)

 

Señor Presidente,

 

Frakshon di Movementu Futuro Kòrsou (MFK), a tuma konta ku djabièrnè último pa medio di Grefir di Parlamento bo a manda un mail pa un reunion pa trata e proyekto di lei ariba menshoná.

 

Frakshon di MFK lo no kansa di indiká na bo persona ku bo ta hibando un maneho partidista den Parlamento i ku bo ta trapa riba e derechi Demokrátiko di un pais kaminda eksistensia di oposishon ta ankra. Oposishon tei pa trese e balanse ku mester tin den tur pais Demokrátiko i abo ta deskriminá oposishon i trapa riba nos derechinan.

 

Frakshon di MFK a entrega 4 inisiativa di lei i te awe bo no ta hasi ningun esfuerso pa e inisiativa di leinan aki wòrdu trata i terminá den Parlamento. Miéntras ku asina Ministernan i/òf miembronan di Parlamento presentá un inisiativa di lei mesora bo persona ta konvoká reunion pa esakinan wòrdu atendé.

 

Tuma komo prueba e medidanan ku a wòrdu introdusí resientemente, den ménos ku 48 ora bo persona a konvoká tantu reunion di komishon sentral komo reunion públiko pa e medidanan kontra di pueblo di Kòrsou wòrdu aprobá. Nos no tin duda ku e proyekto di lei aki di Cannibas tambe lo wòrdu trata den 48 ora, debí ku ya bo a demonstrá ku ta gabinete Rhuggenaath bo ta laga atendé ku e agènda di Parlamento.

 

Pa medio di e karta aki frakshon di MFK kier pidi bo persona, ba baha e tratamentu di e lei aki for di agènda di djárason awor 18 di sèptèmber i na su lugá pone pa tratamentu e proyekto di lei ku MFK pa duna Kontrolaria General e poder pa por drenta entre otro NV nan di gobiernu pa hasi e kontrolnan nesesario. E inisiativa di lei aki a wòrdu entrega for di 12 di yüni 2018 i ku pa awe 16 di sèptèmber 2019, ta kumpli 460 dia ku bo persona no a konvoká un reunion pa trata e proyekto di lei aki.

 

Tambe nos kier kòrda bo riba nos karta fecha 13 di ougùstùs 2019, kaminda nos ta pidi bo un lista di tur reunion ku ta pendiente pa wòrdu konvoká i tambe tur reunion ku ta suspendé. Ta insolito ku despues di 33 dia, ainda bo no por manda e lista pidi aki pa frakshon di MFK.

 

Atentamente, 

 

____________________________

Charles Cooper

Parlamentario pa Frakshon di MFK