Hopi interés pa e Kurso Agente di Peska Turístiko 

Hopi interés pa e Kurso Agente di Peska Turístiko

Ayera tabatin un introdukshon ofisial kaminda  interesadonan,ku ta varia di edat di 18 te ku 58+ a aseptá e invitashon pa partisipá na e Kurso  di preparashon profeshonal “Agente di Peska Turístiko”(APT) na BOKA SAMI.

Un sala kompletamente yen i ku presensia di no menos di 2 minister , minister ing. Hensley Koeiman di SOAW i Minister mr. Suzy Camelia-Römer  a haña un splikashon amplio di e posibilidatnnan aki ku Gobièrnu di Kòrsou ta ofresé na Samineronan.

Interesante dje Kurso aki ta ku e ta ekipá esnan interesá ku tur loke nan tin mester di dje pa ta un piskador profeshonal ku konosementu amplio di téknikanan moderno apliká den peskeria, optené un “vaarbewijs” permit pa por manehá un boto i ku e bentaha adishonal pa por kompaña turistanan den nan interés pa piska o siña piska guia pa un Anfitrion di Boka Sami mes.

E kombinmashon aki lo garantisá ku esnan ku sigui e Kurso aki ku ta dura di 6 luna pa 2 aña e bentaha di por garantisá nan pan di kada dia tur momento sea ku piska ta kome o no ya ku 365 dia pa aña tin turista riba nos isla i kada dia mas i mas nos ta mira e interés grandi pa turistanan biba un eksperensia speshal i úniko ku e habiantenan di e komunidat ku nan a skohé pa bishitá durante di nan fakansi.

Despues di palabranan di introdukshon i splikashon a hiba palabra Jacintha Constancia trèker inkansabel di e  e proyekto mas grandi “Fisherman Village & Open Air Maritime Museum I e proyekto grandi pa logra ku pa promé bes ta hiba Turismo den nos Barionan ku tin un tradishon I kulktura interesante pa kompartí esaki ku nos turistanan. vise-presidente Anton Zimmerman di Sentro i Fundashon San Miguel  a mustra e importansha di e Sentro San Miguel den formashon di habitantenan di Boka Sami. Maarlon Regales a splika den detayes e posibilidatnan speshal dje proyekto aki i ta e persona klave ku a pusha pa e promé start dje proyekto aki por a tuma luga riba e dia aki., Marcel Pinedo pa GMN a amplia riba e bentahanan dje Kurso aki i a yama danki na e grupo grandi ku a asistí e anochi aki i ku a bin yena e formularionan nesesario pa e trabounan di Preparashon por start, Dino Daal di CTB  a duna un splikashon di ròlnan ku miembronan di nos komunidat por hunga den e konsepto nobo kon envolvi komunidat den e aktividat turístiko  ku lo impaktá I kousa un eksperensha úniko di I pa turiwstanan.  Na final minister ing. Hensley Koeiman di SOAW I minister mr. Suzy Camelia-Römer minister di GMN  ambos a mustra kon HUNTU nan lo traha pa yuda kristalisá e proyekto aki .

Na final esnan interesá pa partisipá a yena nan formulario pa saina garantisá ku nan por keda selektá pa e Kurso aki ku ta brinda oporunidat Nobo pa grandi i hóben sin deskriminashon di sekso . Reportahe fotográfiko Tico Vos Filmashon Armand Hellement i NOStv