Siman di Kultura: Promé tayer di marament’i lensu na Sambil tabata un éksito!

Siman di Kultura: Promé tayer di marament’i lensu na Sambil tabata un éksito!

Sambil tambe ta partisipá aktivamente den nos siman di kultura ku diferente aktividat! Kanto, baile, kos di boka dushi pero tambe tayer nan edukativo.  

Ayera djarason, 25 di sèptèmber a toka turno na e promé tayer di marament’i lensu organisá pa Sambil huntu ku Krea HeadWrap.

“Sin duda e marament’i lensu aki a kuminsá for di hopi tempu pasá. Kada manera di mara lensu ku su nifikashon, estilo i okashon, te ku nos a adpotá esaki i hasie parti di nos kultura! Unu ta pasa e konosementu pa otro. Awendia asta a inkorporá e estilo modèrno den marament’i lensu te ku esaki a bira parti di moda pero sin lubida foi unda ela bini”, asina Najhilah i Cenaida van Dinter a splika durante e tayer!

Tur ku a partisipá a keda gaba kon bon esaki tabata I tabata kontentu ku nan mes por a krea nan modèl nan bunita ku nan lensu. Di e manera aki Sambil kier kontribui na e konosementu di e pueblo di Kòrsou. 

Danki na tur ku a partisipá i p’esnan ku a keda afó e biaha aki, keda pendiente pa e próksimo tayer di marament’I lensu ku Krea Headwrap. Sambil mas ku un sentro komersial, ta e sentro kaminda bo por kumpra, gosa i eksperensha momentu nan inolvidabel!