MFK no ta partisipá na ningun reunion di Parlamento ora gobiernu no entrega dokumentonan

MFK no ta partisipá na ningun reunion di Parlamento ora gobiernu no entrega dokumentonan pidi i mas ora ta trata na skonde informashon di hur di edifisionan

 

Dia di 27 di mei 2019, frakshon di MFK a hasi petishon pa un reunion públiko, ku komo tópiko;

 

“Edifisionan ku gobiernu di Kòrsou ta hur serka terser personanan pa ubika departamentonan di gobiernu aden i/òf pa otro uso i tambe edifisionan propiedat di gobiernu ku no ta den uso”

 

E reunion aki a wòrdu konvoká dia 20 di ougùstùs 2019 (despues di 84 dia), na momentu di inisio di e reunion frakshon di MFK a konstatá ku gobiernu no a manda e dokumentonan ku a ser pidi dor di nos frakshon pa por hiba un debate na nivel.

 

Miembronan di Parlamento ku ta sostené gabinete Rhuggenaath a presentá un proposishon di órden, kaminda nan a vota ku maske ku e dokumentonan no ta presente pa e reunion kontinuá. Frakshon di MFK komo esnan ku a pidi e reunion no por a bai di akuerdo ku e proposishon deskabeyá aki, di e 12 nan ku ta sostené gobiernu. Komo esnan ku a pidi e reunion frakshon di MFK a pidi pa baha e punto di agènda i kanselá e petishon di e reunion.

 

Riba 20 di ougùstùs 2019, frakshon di MFK a entrega un petishon pa un reunion nobo ku e mesun punto di agènda ariba menshoná. Awe 26 di sèptèmber, a konvoká e reunion i un biaha mas frakshon di MFK a konstatá ku tur dokumento no a wòrdu manda pa Parlamento, tabata falta dokumentonan di hur di tres edifisio di tres ministerio, kual ta ministerionan di Asuntunan General, SOAW i VVRP. Frakshon di MFK un biaha mas a mustra ku gabinete Rhuggenaath no ta tuma Parlamento na serio i no ta entrega e dokumentonan komo debe ser pa nos por hiba un debate na nivel den Parlamento.Tabata un sorpresa pa nos frakshon di tende un miembro di Parlamento, argumentá ku e reunion por kontinuá debí ku 80% di e informashon ta presente. Ku otro palabra Parlamento mester ta kontentu ku un parti di e informashon pidi so ta disponibel.

 

Pais Kòrsou mester wòrdu goberná na serio i gobièrnu mester pone tur dokumento disponibel pa Parlamento, debí ku ta Parlamento tin e “Budgetrecht”.

 

Frakshon di MFK por komprondé ku kier a sigui e reunion sin e dokumentonan di entre otro ministerio di SOAW, debí ku den SOAW tin hopi kos di skonde relashoná ku hürmentu di edifisionan. Frakshon di MFK no ta kai den e weganan aki, kaminda gabinete Rhuggenaath ta trata na skonde informashon pa pueblo di Kòrsou i Parlamento.

 

Pa e motibu aki, frakshon di MFK a pidi presidente di Parlamento pa skors e reunion, te ora gabinete Rhuggenaath pone tur dokumento relashoná ku hürmentu di edifisionan di gobiernu di tur ministerio disponibel.

 

Gilmar Pisas

Lider di frakshon di MFK

Kòrsou, 26 di sèptèmber 2019