FMA ku kurso pa stòp di huma 

FMA ku kurso pa stòp di huma 

 

Dia 30 di òktober próksimo Fundashon pa Maneho di  Adikshon , FMA , lo organisá otro kurso pa stòp di huma. 

Komo e ta legal, hopi hende no ta realisá ku tabako ta un droga i ku e por resultá adiktivo. Huma di tabako tin hopi ingrediente venenoso,  manera entre otro nikotina, ter i ‘koolmonoxide’. 

 

Nikotina ta e ingrediente  ku ta laga bo sinti dushi i relahá, pero e ta venenoso i por hasi bo adikto. Nikotina ta sera bo ardu i subi bo preshon. Si un órgano manera bo kurason no haña sufisiente sanger e no por funshoná mas i bo por haña atake di kurason. 

E ter ta un supstansia pretu ku ta keda plak den bo pulmon kuminda e ta kousa sikatris i ta pone ku bo ta tosa kontinuamente. 

Koolmonoxide ta un gas sin oló i sin koló. E ta stroba e sanger transportá oksígeno pa e múskulonan i meskos ku Nikotina ta okashoná verkalking.  

Humamentu no ta afektá e humadó so, e ta afektá salú di tur ku ta den su besindario di esun ku ta huma. Asina huma di sigaria ta stroba kresementu di pulmon serka mucha ku konsekuensia ku e ta keda ku problema ku respirashon pa bida largu. 

 

Adikshon na nikotina i e kurso pa stop di huma ta tópiko di e siguiente programa informativo di Fundashon pa Maneho di Adikshon, FMA i Fundashon Wega di Number Korsou (FWNK). E programa lo ta djaluna 30 di sèptèmber na TCFM i lo tin komo invitado sikólogo di FMA, Jennet Cova. 

Den e programa entre otro lo pone atenshon na kousa ,  tratamentu i prevenshon na adikshon di nikotina i kontenido di e kurso pa stòp di huma. 

E programa ta e di tres den un seri di 6 edishon ku ta parti di e proyekto preventivo kontra adikshon, ku ta enserá spòt radial na emisornan Mas 99, TCFM i Rock Korsou i tambe un programa radial mensual na TCFM. 

Meta di e proyekto ta pa duna mas publisidat na e malesa di adikshon i e trabou di FMA den esaki. 

E kampaña ta kore di yüli te ku desèmber di e aña aki, ku e intenshon pa kontinuá otro aña tambe. 

Fundashon pa Maneho di Adikshon i Fundashon Wega di number Korsou pa medio di esaki ta invitá un i tur pa sintonisá e programa edukativo aki djaluna awor 30 di sèptèmber na Telekorsou FM di 7 or pa 8 or di anochi. Lo tin posibilidat pa yama na number 461-5933 of 9330 pa hasi pregunta. 

Number di FMA mes pa inskripshon pe kurso ta 461 5977 of  670 5544(whatsapp).