REGATA DI BONEIRU 2019 PARTI LAMAN DEN PLAYA
REGATA DI BONEIRU 2019 PARTI LAMAN DEN PLAYA
Kralendijk- Faltando 2 siman pa Regata, nos por bisa ku preparashonnan ta kanando den gran forma pa loke ta trata ‘Bonaire Regatta 2019’. Manera ta konosí, e aña aki nos ta selebrá e di 52 edishon di ‘Bonaire Regatta’ i esaki lo bira un selebrashon grandi, ku ta kuminsá dia 9 di òktober i ta terminá dia 12 di òktober 2019.
E aña aki Regata lo ta den Playa pa karedanan riba laman . Riba djarason 9 di òktober pa 2 or atardi na Fòrti lo kuminsá ku e inskripshon ofisial pa partisipantenan ku ke kompetí den Regata. E karedanan riba laman ta ranka sali djaweps 10 di òktober for di 9’or di mainta. Kas di Regata ta bira e sitio kaminda mayoria boto chikitu lo drenta awa I lo bin direkshon di Kralendijk. Djabièrnè ta e di 2 dia di kareda ku ta terminá ku un ‘happy hour’ di 5’or pa 7’or di atardi ku bon ambiente pa tur hende por gosa di dje kantu di laman. Riba e di 3 dia ku ta e último dia di Regata lo tin e ‘boat party’,den bahia di Kralendijk. Anochi lo tin e seremonia di entrega di premio riba e ensenario prinsipal di Regata den Playa.
Manera tur aña tin e karedanan entre yate, optimist, sunfish, windsurf i kitesurf, Microboats, boto di piskado I mas. E team di Regatta ta hasiendo hopi esfuerso pa stimulá partisipantenan lokal I internashonal pa engrandesé nos Regata.
Kant’i awa riba malekon durante dia di djaweps I djabièrnè tin entre otro lès di traha microboats I tambe lès di windsurf. E lesnan aki lo ta gratis pa tur hende. Ku esaki Hype Events kier stimula e deporte nan aki I lanta e interes prinispalmente den nos hobenan pa ku e deporte nan aki. Djabièrne ta bai tin shou di windsurf i seadoo. Tambe tin un aria pa mucha na unda nos muchanan por disfrutá di diferente wega entre otro di weganan di awa.
Nos kier a gradisí tur nos spònsernan i esnan prinsipal ku no a duda niun ratu so den Regata 2019. Sigun dianan ta aserkando lo tin mas rueda di prensa pa pueblo di Boneiru ta bon na altura di e último desaroyonan i tambe por sigui nos via nos retnan sosial.
Nos kier enkurasha e komunidat di Boneiru kompletu pa bin disfruta di e kompetensia nan riba laman durante e dianan di Regatta.
Pa mas informashon of pregunta relashoná ku Regata por tuma contacto ku e organisashon riba 7890015 òf bishitá e wèpsait ofisial di Regata: www.regattabonaire.com.