RESUMEN DI SIMAN DI GABINETE WEVER-CROES 22-28 SEPTEMBER 2019

October 1, 2019 REDAKSHON

Durante e siman di 23 pa 27 di september, a tuma luga na New York e di 74 Reunion General di Nacionnan Uni (‘General Assembly’). Premier Evelyn Wever-Croes y Minister Lampe a forma parti di e delegacion di Reino. Premier Wever-Croes a atende mas di 30 reunion, el a duna 7 discurso, y a duna 2 entrevista na television. Premier Evelyn Wever-Croes a atende varios reunion riba e tema di Sustainable Development Goals SDG’s, Metanan di Desaroyo Sostenibel. Ta trata di e 17 metanan cu Nacionnan Uni a stipula pa crea un miho mundo pa 2030 cuanan Aruba tambe ta compremeti pa cumpli cu nan.

Un tema cu Premier Wever-Croes a atende tabata e Posicion di Hende Muhe y Oportunidad pa Hende Muhe. Premier Wever-Croes a organisa un breakfast meeting cu lidernan femenino di New York y tabata orador na un encuentro di UN Women cu titulo “She decides”. Premier a reuni cu e Director ehecutivo di UN Women, sra. Malambo y a yega na palabracionnan cu Nacionnan Uni por yuda Aruba desaroya maneho riba e tereno aki.

E tema di corupcion y bon gobernacion tambe tawata temanan importante di discucion den e reunionnan na Nacionnan Uni incluyendo digitalisacion y e-Government. Banda di varios reunionnan di Nacionnan Uni, Prome Minister a reuni cu World Economic Forum (WEF) y cu e organisacion OECD na unda tambe a toca e temanan menciona y a haci palabracionnan hopi interesante. Premier Wever-Croes a organisa un reunion cu varios lider di paisnan den Caribe pa delibera con pa crea un fundeshi mas solido di bon gobernacion, y a urgi pa traha hunto y colabora cu otro. Na e reunion aki Rey Willem Alexander tambe tabata presente.

Premier, probechando tambe cu presente na e Asemblea General di Nacionnan Uni tawata tin varios lider di diferente pais den region, a tuma e oportunidad pa reuni cu varios pa trata e tema di Venezuela. Prome Minister a reuni cu e Embahador di Reino na Washington sr. Haspels na unda Prome Minister a ricibi un ‘update’ amplio riba e ultimo desaroyonan. Tambe Premier a atende un reunion riba tereno ministerial di Caribe cu Under Secretary of State David Hale entre otro riba e tema aki.

Tambe Premier a atende reunion di entre Su Mahestad Willem Alexander y Reina Maxima hunto cu e Ministernan di e 4 paisnan di Reino Hulandes, y un reunion separa cu e 4 Premiernan den Reino, na unda a trata e relacion di Reino en general y e cooperacion entre e paisnan den Reino. Di parti di Aruba, Premier a trece padilanti cu loke nos mester ta espacio y tempo pa nos cumpli cu e palabracionnan cu nos a haci pa asina nos saca Aruba for di e problemanan financiero. Premier a enfatisa cu Aruba ta bayendo den e bon direccion cu un economia creciente, turismo ta creciendo y desempleo ta bahando. Y pa loke ta trata e situacion financiero di nos pais, el’a indica cu nos a bin di deficitnan di 300 pa 400 miyon florin durante e Gobierno anterior. E Gobierno actual a baha esaki te cu 25 miyon florin e aña aki y ta trahando riba e prome balanced budget den hopi tempo pa Aruba.

Premier Evelyn Wever-Croes tabata orador principal na e conferencia di World Tourism and Travel Council, na World Trade Center na New York, den cual el’a enfatisa riba e importancia pa mundo turistico tambe contribui na e metanan di desaroyo sostenible, y a splica e pasonan cu Aruba ta tumando den e direccion ey, y e rol importante cu innovacion ta hunga den esaki. Na e conferencia tabata tin varios inversionista interesa den inverti na Aruba.

Minister Lampe a habri e siman cu reunion na New York cu New York University, pa delibera riba e MOU cu ta existi cu IPA. E autoridadnan academico ta positivo en cuanto e colaboracion cu Aruba, y ta mira posibilidad pa expande esaki.

Minister Lampe a forma parti di e delegacion di Reino Hulandes atendiendo e UN General Assembly y tabata util pa networking en cuanto Educacion y SDGs.

Minister Lampe tabata keynote speaker na e summit en cuanto CBD y Hemp como pilarnan economico nobo denter di e vision di Economia Circular. Na e encuentro aki 600 participante a representa companianan chikito y grandi den e desaroyo economico nobo aki.

Na Aruba a celebra e reapertura di Scol Scucha Nos na Emma school cu un klas pa muchanan cu problema di oido.

Tambe na Museo Archeologico a tuma luga e workshop organisa pa Monumentenfonds pa siña e abilidad nobo di conservacion di un monumento.

Marco de Souza di Leerorkest Amsterdam tabata di bishita na Aruba unda a funda e siman aki e stichting Leerorkest Aruba y a cuminsa cu e prome piloto, scol na Laura Wernet Paskel en cuanto les di musica como actividad extracuricular y a resulta hopi exitoso cerca nos muchanan, specialmente di famianan den necesidad.

Den cuadro di introduccion di ROPV, a tuma luga e siman aki tres anochi di informacion referente ROPV. Uno na Oranjestad, Na Noord y na San Nicolas. E grupo di persona presente a tuma nota di e presentacion y alabes a haci uzo di e oportunidad pa haci pregunta riba locual a wordo presenta. DIP ta contento cu e participacion di comunidad y tambe na nan contribucion na reglamentacion di desaroyo di Aruba. No por tin un bon planificacion di desaroyo teritorial, si no crea un balansa entre desaroyo infrastructural y medio ambiente, esaki ta locual cu Ministerio di Infrastructura a bin ta propaganda y implementa durante e ultimo dos añanan aki.

Despues di cu un par di luna, Departamento di Naturalesa y Medio Ambiente (DNM), hunto cu stakeholders a bin ta trahando riba e miho forma cu por crea e balansa aki cu constantemente tabata en busca di dje, siman pasa Minister Otmar Oduber a acorda y aproba e maneho di Build with Nature. Un maneho cu ta wordo introduci desde prome di October venidero.

Recientemente tin hopi informacion tocante e ley di Serlimar. Mester bisa cu e ley nobo di Serlimar ta clarificacion di e ley existente. Esaki ta necesario pa asina por ancra e responsabilidad cu Serlimar tin encuanto bienestar general y pa percura cu tin un punto di salida cla y transparente pa tur otro compania y partner den e sector di recogemento y maneho di sushi. E ley ta esencial pa yega na e maneho duradero di desperdicio y pa yega na cera y sanea dump Parkietenbos cu ta un problema medio ambiental y un calamidad wardando pa pasa. E habitantenan di Artuba en general, y sigur e habitantenan di Simon Antonio y vecindario merece un solucion pa e dump actual.

Gobierno a firma acuerdo cu grupo di arkitecto y ingeniero local pa diseño di proyecto di vivienda sostenibel na San Nicolas. Gobierno a traves di DIP ta sacando un gran cantidad di tereno pa vivienda. Sinembargo ta yega e punto cu ta te cierto cantidad di tereno tin. Pues p’esey un di e manehonan cu tin, ta pa cuminsa construi mas vertical. Ta gradici e team ADIAA cu ta encera ingeniero y arkitectonan cu a tuma e reto pa realisa e proyecto aki. E compromiso ta pa dia 15 di November tin e diseñonan di e viviendanan aki pa por presenta esakinan na comunidad interesa.

Recientemente a tuma luga “World Cleanup Day”, un dia cu mundialmente gruponan forma primordialmente pa voluntarionan pero tambe organisacionnan ta reuni pa haci nos planeta limpi. Haciendo cayanan limpi, beach, mondi y lama. Banda di e meta cu ta pa haci nos planeta limpi, e dia ta enfoca riba stimulacion di henter e comunidad pa uni y haci algo positivo hunto

En conexion cu esaki Serlimar, a organisa un dia di limpiesa den e bario di Noord (na ex veld di National) cu a resulta exitoso.

Dialuna Minister Ruiz-Maduro a haci apertura di e tayer di ‘National Risk Assessment’ cu a wordo organisa pa Banco Central di Aruba y Banco Mundial. Durante e tayer aki, expertonan di Banco Mundial a asisti ehecutivonan di nos Pais cu ta traha riba e tereno pa combati labamento di placa y financiamento di terorismo cu un metodo pa compila y procesa informacion necesario pa yega na un mapa di e risico y vulnerabilidadnan cu Aruba tin pa wordo maluza pa criminalnan. E ‘National Risk Assessment’ ta sumamente importante pa nos Pais ya cu Aruba ta wordo evalua pa Caribbean Financial Action Task Force (CFATF) na 2020 y e informacion compila ta yuda na proteha nos Pais contra e menasa di labamento di placa y financiamento di terorismo.

Minister di Cultura a haci apertura di e Curso di Calki cu ta wordo organisa pa Monumentenfonds hunto cu e compania Parvenir Heritage Restoration & Maintenance Company Ltd di Trinidad & Tobago den cooperacion cu Museo Arkeologico y Stichting Rancho. E meta di e curso ta pa brinda educacion riba e ofishi di traha cu calki pa asina e habilidad aki keda conserva y por wordo pasa pa mas generacion. Hopi monumento na nos Pais ta traha di calki y p’esey pa por restaura y renoba nan, nos hendenan mester tin e conocemento y e habilidad pa traha cu calki. Bastante persona y instancia a mustra interes den e curso. Esaki ta brinda e speransa cu mas hende ta consciente cu ta importante pa nos educa nos mes riba e balor historico di nos monumentonan y sitionan di interes y cu nos mester percura pa restaura nan debidamente pa asina nan por keda conserva como nos herencia cultural.

Minister Ruiz-Maduro a haci entrega di certificado na e cursistanan di Empresario Prepara II. Durante e curso cu a dura 10 siman, e cursistanan a haya informacion con pa crea un cultura innovativo den nan negoshi, con pa diseña un website, con pa sigui engrandece e nivel di informacion y strategia pa haci nan negoshi exitoso y con pa por cumpli cu nan debernan fiscal pa asina por maneha nan negoshi na un manera mas eficiente.

Minister Ruiz-Maduro a brinda informacion riba e situacion financiero di Pais Aruba y a splica kico, entre otro, Gobierno ta haci pa baha e gastonan di personal y pa stabilisa e crecemento di debe di nos Pais. Minister Ruiz-Maduro a brinda informacion tambe riba e dos cartanan cu a bini di CAFT. Un carta a wordo dirigi na Conseho di Minister di Reino di cual Minister President y su persona a ricibi un copia y un otro carta a wordo dirigi na Parlamento di Aruba. Den e carta dirigi na Conseho di Minister di Reino, CAFT ta manda pidi un ‘aanwijzing’ pa Gobierno di Aruba pa motibo cu Gobierno no lo a cumpli cu e recomendacion di CAFT di integra e Fondo di e Plan di Crisis Social den Presupuesto 2019. Apesar cu Gobierno a brinda informacion varios biaha na CAFT y na Hulanda riba e parti aki, toch CAFT ta keda insisti pa haci cambio pa disolve e Fondo y integra esaki den Presupuesto 2019. E carta aki no ta publico. E carta cu CAFT a manda pa Parlamento ta pa notifica riba nan conseho pa ‘aanwijzing’ na Conseho di Minister di Reino. Enves di djies notifica conforme ley, CAFT a opta pa argumenta bisando e mita berdad, locual ta causa confusion innecesariamente ya cu e carta aki ta publico. Gobierno lo keda pendiente kico ta e resultado di e carta di CAFT y e opinion di Conseho di Minister di Reino riba esaki.

Tambe Minister Ruiz-Maduro a anuncia cu BBO/BAZV y BAVP ta keda den e prijs di e producto/servicio y cu ta brinda comercio e opcion pa specifica riba e recibo cual parti di e prijs ta wordo paga na BBO/BAZV y BAVP. Na e manera aki e consumidor por tin e transparencia necesario, ya cu e prijs cu e producto tin riba reki ta e prijs cu e consumidor ta paga na caha.

Minister Ruiz-Maduro a reuni cu Camara di Comercio pa asina por keda den contacto y intercambia informacion y opinion riba topiconan cu ta toca comercio. Tabata un bon reunion den cual a trata e tema di BBO riba factura, reforma fiscal y sugerencia pa concretisa e Economic Policy di Aruba.

Director di Departamento di Finansa a haci entrega di e Cuenta Anual di Pais Aruba pa 2018 na Minister di Finansa. Den e Cuenta Anual por mira cu Gobierno a cumpli cu e norma di deficit den 2018, ya cu e deficit a baha compara cu 2017. Den 2018 e crecemento di debe tambe a keda stabilisa. E Cuenta Anual lo wordo manda pa Controlaria General (ARA) pa asina por wordo investiga y CAFT tambe ta ricibi e Cuenta Anual pa asina duna nan opinion. Despues cu e instancianan aki keda cla, e Cuenta Anual por bay Parlamento di Aruba pa su tratamento y pa stipula e saldo pa 2018.

Dialuna 23 di September Minister di Husticia mr. Andin Bikker a duna relato den conferencia di prensa di Gobierno di su reciente biahe pa capital di Merca, Washington DC, caminda a reuni referente temanan di cooperacion riba tereno di Husticia, manera Cyber Security, retonan di Crypto Currency, sistema pa monitor un preso (Inmate Tracking System), combatimento di trafico ilicito di persona, optimalisa siguridad di frontera y actualisa leynan a base di sistema comparativo (rechtsvergelijking).

Den cuadro di e bishita di Minister Bikker na Merca, e mandatario tabatin un reunion na Embahada Hulandes cu diferente departamento Mericano cu ta atende cu frontera, unda a trata e sistema di electronic gates ‘Happy Flow’ na aeropuerto cual ta traha a base di biometrics. Tambe Minister Bikker a cera conoci y reuni cu e Embahador nobo di Hulanda pa Merca, sr. André Haspels.

Minister Bikker despues di e conferencia di prensa a bay aeropuerto Reina Beatrix pa saluda y reuni un rato cu Prome Minister di Corsou, Sr. Eugene Rhuggenaath cu tabata di transito na Aruba, na caminda pa New York pa bay atende reunionnan na Nacionnan Uni. E dos mandatarionan a papia riba varios punto di posibel cooperacion mutuo, entre nan cooperacion pa train huristanan den e tecnica di concipia proyectonan di ley pa asina amplia e capacidad pa por modernisa nos leynan (wetgevingscapaciteit).

Dialuna merdia, Minister Bikker a bay Colegio Laura Wernet Paskel na Cadushi Largo pa presencia inicio di e proyecto piloto di Leerorkest, un proyecto cu ta duna alumnonan e oportunidad pa haya les di canto y muziek gratis. E proyecto piloto a cuminsa cu les di canto cu ta cana durante aña escolar 2019/2020. E scolnan cu ta participa den e proyecto piloto ta Colegio Laura Wernet Paskel, Sint Anna School, Prinses Amalia y Paulus School. Minister Bikker ta hopi orguyoso di e iniciativa a base di un Letter of Intent cu el a propone hunto cu colega Minister di Husticia di Hulanda mr. Ferdinand Grapperhaus y Minister di Enseñansa sr. Armando Rudy Lampe. Minister Bikker ta gradicido na cada un cu a duna un aporte pa e proyecto piloto por a cuminsa.

Diaranson Minister Bikker a reuni cu Commandant der Strijdkrachten, Luitenant-Admiraal Rob Bauer den cuadro di un bishita di cortesia unda a intercambia di idea di cooperacion entre Hulanda y Aruba.

Diahuebs mainta Minister Bikker a reuni cu tanto director di Leerorkest Amsterdam Sr. Marco de Souza como tambe Werkgroup di Leerorkest Aruba. Un di e temanan cu a bin dilanti ta con Aruba lo por haya ayudo pa yega na instrumentonan musical pa e di dos fase di Leerorkest Aruba na 2020.

Diabierna 27 september Conseho di Minister a aproba nombramento di Alto Comisario Interino Sr. Andrew Hoo como Alto Comisario permanente. A base di un maneho integral bow guia di Comisario Hoo, nos Cuerpo Policial a logra trece trankilidad y siguridad, entre otro door di pone mas visibilidad di Polis den nos comunidad, aereanan comercial y turistico (TOPPS), controlnan severo y reduccion substancial di casonan di atraco arma.

Diabierna mainta na oficina di notario mr. Hilde Rodriguez-Taekema, a revisa e envelopnan di e companianan cu a reacciona a base di e Request for Expressions of Interest pa construccion di un KIA nobo. Un total di shete compania a haci entrega di nan envelop na oficina di e notario.

Diabierna atardi Minister di Husticia mr. Andin Bikker a haci entrega di yabi pa un bus pa transporte di persona na Sra. Gertrude Hassel encarga cu Guarda nos Costa, y pa cuatro bus pa transporte di detenido na Sr. Ronny Geerman director di CEA. Minister Bikker a splica cu Aruba a adkeri e busnan den cuadro di cooperacion cu Hulanda riba tereno di Husticia. El a gradici Director di CEA kende a tuma e iniciativa, su colega Minister di Husticia di Hulanda mr. Ferdinand Grapperhaus, colega Minister Plenipotenciario sr. Guilfred Besaril, personal di Arubahuis y e compania di transporte pa cada un su aporte pa por a logra cu GNC y CEA awo tin e vehiculonan aki nan na disposicion.

Diabierna 27 di september e siman a cera cu celebracion di un hubilario na Directie Wetgeving en Juridische Zaken. Sra. Elaine Fingal Semerel a cumpli 30 aña trahando na DWJZ. Minister Bikker a pasa felicita Sra. Fingal Semerel cu su 30 aña di servicio y alabes haci entrega di un obsekio chiquito como muestra di aprecio pa tur su añanan trahando como empleado publico.

Minister Dangui Oduber a reuni cu representantenan di CARPHA y tambe departamento di salud publico pa set up un registro pa e malesa cancer. Den bon cooperacion cu CARPHA ta bay logra esaki pa di e forma aki nos traha riba prevencion di esaki pa purba scapa mas bida posibel.

Dia 27 September tawata dia mundial di turismo. Turismo ta keda e driver principal di nos economia. E dia aki a wordo celebra na Renaissance Convention center hunto cu tur stakeholders y tambe studiantenan di EPI y Universidad di Aruba. E mandatario ta bisa cu palabra di danki no ta suficiente pa tur persona cu ta traha directamente den e industria. “Boso ta e cara cu ta representa Aruba y ta merece tur elogio cu por tin pa e trabou cu boso ta desplega diariamente”, Minister Dangui Oduber a expresa.

Den sala di Parlamento a tuma luga e openbare bijeenkomst riba e proyecto di hospital caminda miembronan di Parlamento por a haci diferente pregunta na SOGA, Hospital y AIB pa di e forma aki haya claridad riba e situacion cu a surgi na Hospital.

E di 4 edicion di Island Fest tawata un exito grandi. Island Fest a converti su mes den e festival turistico di nos isla. Masha hopi turista y hopi local.