Consulta di trabou entre Ministerionan di Enseñansa, Cultura y Sciencia  di e 4 paisnan den Reino Hulandes

Consulta di trabou entre Ministerionan di Enseñansa, Cultura y Sciencia 

di e 4 paisnan den Reino Hulandes

 

ORANJESTAD – Recientemente a tuma luga na Boneiro un reunion di representantenan di Ministerionan di Educacion, Cultura y Sciencia di Hulanda, Corsou, St. Maarten y Aruba. 

Esaki tabata e prome consulta, despues cu e Ministernan di Enseñansa y Cultura a reuni na februari ultimo. Durante e reunion aki e representantenan di e cuater Ministerionan a bini hunto pa discuti varios topico tocante educacion, cultura y ciencia.

Pa Aruba riba tereno di cultura Sra. Ruby Eckmeyer a representa Ministerio di Finansa, Asuntonan Economico y Cultura. Sra. Anne Marie Proveyer y Sra. Gina Ras-de Kort a representa Ministerio di Enseñansa, Ciencia y Desaroyo Sostenibel. Tur e conseheronan di minister di e 4 paisnan a reuni pa prepara  pa e siguiente reunion di ministernan ‘Vierlanden Overleg’ cu lo tuma luga dia 11 y 12 di november e aña aki na Hulanda.

 

E aña aki tambe ta tuma luga e Conferencia General di UNESCO na Paris for di dia 12 te cu 27 di november. Den cuadro di esaki a prepara un documento cu e ministernan di Caribe Hulandes hunto cu minister di Hulanda lo bay presenta na e conferencia menciona. Tur cuater minister di Reino lo hiba palabra durante di e conferencia general di UNESCO.

 

Den e asina yama ‘4 Landen Ministrieel Overleg’ cu a tuma luga na februari na Corsou, e empleadonan publico a haya e tarea pa lanta gruponan di trabao na nivel di departamento, unda den colaboracion cu eventual otro organisacionnan, ta traha di un manera structura cu otro. E trabounan ta keda ehecuta a base di un acuerdo cu e ministernan di tur cuater pais a firma riba tereno di cultura, enseñansa y ciencia. 

 

E diferente gruponan di trabao ta traha riba tereno di Profesionalisacion di Maestro; Efecto civico di e estudionan di ley den Reino; Acoplacion di e sistemanan di enseñansa den Reino; Pasantia pa studiantenan di MBO/EPI entre e islanan den Reino; Financiamento pa estudio; Agenda pa Investigacion; Biblioteca Digital; Lantamento di un Fondo pa Investigacion Cultural; Herencia Cultural Intangibel y Herencia Cultural Aquatico. Cada 3 siman e conseheronan di e ministernan concerni ta reuni cu otro via video conference pa asina monitorea e trabounan cu mester tuma luga segun e palabracionnan cu e ministernan a haci. 

 Team di empleadonan publico di e 4 paisnan Team di conseheronan di Aruba