Parlamentario Curtley Obispo: Status di e Handleiding Beoordeling- en Ontwikkelsysteem Overheid Curaçao
Minister di Gobernashon, Planifikashon i Servisio Públiko
Señor Drs. Armin Konket
Plasa Horacio Hoyer # 9
Djabièrnè, 11 òktober 2019
Tópiko: Status di e Handleiding Beoordeling- en Ontwikkelsysteem Overheid Curaçao
Apresiabel Minister señor Armin Konket,
Pais Kòrsou a kaba di kumpli 9 aña. Ta un hecho ku durante 9 aña konsekutivo no tin un Handleiding Beoordeling- en Onwikkelsyteem Overheid Curaçao. Pa 9 aña konsekutivo tambe no ta kumpliendo ku artíkulo 15 insiso 4 di e Landsverordening Materieel Ambtenarenrecht. Artíkulo 15 insiso 4 ta indiká i mi ta sita na Hulandes: “Het bevoegde gezag stelt nadere regels vast aangaande het beoordelen van ambtenaren. Deze regels worden vastgesteld bij landsbesluit, houdende algemene maatregelen”.
Tambe e Presupuesto 2019 di Pais Kòrsou inkluyendo Presupuesto Supletorio ta indiká ku gastu di personal lo ta pa un suma presupuestá di 434.2 mion florin.
Den kuadro ariba menshoná, mi programa di kontròl parlamentario i mi ròl di kontròl parlamentario mi ta aserká señor Minister Konket ku e siguiente preguntanan, hasiendo uso di mi derecho komo parlamentario pa hasi pregunta konforme artíkulo 57 di Areglo di Estado di Kòrsou (nos lei máksimo) i tambe artíkulo 96 di Reglamentu di Órden di Parlamento di Kòrsou. Ta trata di e siguiente preguntanan:
- Kua ta e motibunan konkreto ku durante e periodo 10 òktober 2010 te ku 20 yüli 2016 no a implementá e “Handleiding Beoordeling- en Ontwikkelsysteem Overheid Curaçao”.
- Kua ta e motibunan konkreto ku durante e periodo 21 yüli 2016 te ku 28 mei 2017 no a implementá e “Handleiding Beoordeling- en Ontwikkelsysteem Overheid Curaçao”.
Aki mi ta referí na e Dekreto Nashonal (“Landsbesluit”) di 29 yüli 2016 number 16/2065 ku ta trata un konbenio entre Gobièrnu di Kòrsou di e tempu ei i e Centrale Commissie van Vakbonden;
- Kua ta e motibunan konkreto ku durante e periodo 29 mei 2017 te ku 10 òktober 2019 no a implementá e “Handleiding Beoordeling- en Ontwikkelsysteem Overheid Curaçao”.
- Kon leu ta ku preparashonnan den aña 2019 pa ku implementashon di e Handleiding Beoordeling- en Onwikkelsyteem Overheid Curaçao”?
- Kua ta e fecha konkreto pa Gobièrnu di Kòrsou implementá e “Handleiding Beoordeling- en Ontwikkelsysteem Overheid Curaçao”? I asina porfin por kumpli ku artíkulo 15 insiso 4 di e Landsverordening Materieel Ambtenarenrecht.
Atentamente,
Curtley Obispo
Parlamentario pa Kòrsou
PAR
