FMA i FWNK ta amplia kampaña di informashon Prevenshon di adikshon na trabou
FMA i FWNK ta amplia kampaña di informashon
Prevenshon di adikshon na trabou
Un empleado ku ta usa droga òf bebe di mas alkohòl ta un peliger pa su mes, su koleganan i kliente di su organisashon òf empresa. E por afektá e proseso di trabou i baha produktividat na boka di trabou.
Fundashon pa Maneho di Adikshon e luna aki lo dediká èkstra atenshon na e tópiko aki , durante un programa djaweps awor, 17 di òktober, di 5 or pa 6 or na Radio Mas.
Esaki lo ta e promé di un seri di programa ku kontenido preventivo na e emisora aki. FMA ta presentando programa informativo kaba tur delaster djaluna di luna na Telecuracao FM. E programa nan na Radio Mas pues ta un ampliashon di e kampaña informativo ku FMA a start kuné na yüni dje aña aki i ku lo kore te desèmber próksimo. E kampaña ta patrosiná pa Fundashon Wega di Number Korsou (FWNK) ku di e manera aki ke sostené prevenshon di adikshon en general.
Durante e programa radial na radio Mas djaweps awor, lo enfoká riba e pakete di servisio ku FMA ta ofresé na empresa i ku ta konsistí di entre otro:
- Desaroyá un plan di maneho preventivo i struktural en konekshon ku adikshon ;
- Seshon di informashon pa tur empleado di organisashon/ kompania
- Treinen di staf/ supervisor pa rekonosé adikshon
- Duna tratamentu i guía na empleado
Invitado den e programa lo ta Sonaly Diaz, kende ta enkargá ku aktividat preventivo i treinen na FMA. E tópiko di prevenshon di adikshon na trabou lo bin dilanti tambe dia 28 di òktober na TCFM pa 7 or di anochi.
Durante tur dos programa lo tin oportunidat pa hasi pregunta.
FMA i Fundashon Wega di Number Korsou ta invitá bo pa sintonisá i partisipá den e programanan aki ku ta di interés general.
Pa kualke informashon adishonal por yama FMA na 461 5977 of 670 5544 (whatsapp).