Willemstad – Gobièrnu ta hasi entrega ofisial di e kuadro di maneho pa e área di ‘Arbeidsgericht Onderwijs’ (AGO) den enseñansa sekundario. Entrega a keda ofisialisá pa Minister di Hustisia sr. Quincy Girigori komo representante di Minister di Enseñansa, Siensia, Kultura i Deporte (ESKD), den presensia di representante di Sentro pa Inovashon i Guia Edukashonal (SIGE) i tur direktiva di skolnan ku tin skol di AGO. Alabes Minister Girigori huntu ku SIGE a lansa e ‘wèpsait’ pa AGO ku ta brinda tur informashon i tambe ta duna e oportunidat pa krea un plataforma pa komparti informashon relashoná ku e enseñansa práktiko aki.

E kuadro pa organisashon di AGO, konforme e ‘Landsverordening Voortgezet Onderwijs, artikel 11c, 3de lid’, ta enfoká pa e alumno logra mas tantu ku ta posibel e metanan núkleo di Formashon Básiko i riba e empeño pa prepará e alumno optimal pa por ehersé funshonnan simpel riba merkado laboral. Ku e kuadro nobo aki e kampo di enseñansa ta haña instrumentonan mas fuerte i sólido pa oumentá e kalidat di AGO i e ta fungi komo é instrumento fundamental pa uniformá e diferente skolnan di AGO na Kòrsou. Awor, ku un AGO uniforme, por garantisá mihó kalidat den enseñansa, kaminda alabes Inspekshon tin e medionan pa inspektá AGO di un forma mas dirigí. Pa mas informashon por bishitá e ‘wèpsait’: www.ago.cw.

E trayekto pa yega na e kuadro di maneho aki, a keda guiá pa organisashon di maneho di ministerio di ESKD den estrecho koperashon ku SIGE ku a duna un kontribushon di gran balor pa por yega na un struktura di maneho ku ta keda kargá pa profeshonalnan di AGO. Presidente di direktiva di SIGE, sr. Paul de Rooy a tene un diskurso kaminda ela elaborá riba e importansia di e optimalisashon di AGO i ròl di SIGE komo fundashon ku ta duna guia. Direktor di maneho sra. Susan Larmonie-van Heydoorn a papia tokante e nesesidat pa uniformidat i struktura ku tabata nesesario pa por garantisá optimalisashon di AGO i alabes mustra riba e importansia pa esaki den e sektor di Enseñansa i Siensia huntu ku Inspekshon di Enseñansa ku a sa di karga e trayekto aki.

Durante di e atardi tambe direktor di skol Joseph Civilis AGO, sr. Weshall Paulina a elaborá riba su eksperiensia ku e trayekto di optimalisashon di e struktura pa por akoplá e grupo di enfoke di hóbennan ku ta mas dirigí riba e parti di práktika.

Representando nos Gobièrnu, Minister Girigori a trese dilanti ku ta ku gran satisfakshon Gabinete Rhuggenaath a aprobá e kuadro di maneho aki. Siguientemente Minister Girigori a hasi entrega di e kuadro di maneho na tur aktor prinsipal den e área di AGO i a gradisí tur ku a traha riba e kuadro maneho pa a duna nan aporte den e trayekto aki.

—
KOMUNIKASHON

** riba e potrètnan athunto por tuma nota di e entrega ofisial i momentu ku a lansa e ‘wèpsait’.