Kurso “Leadership Skills” organisá pa Desert University tabata un èksito rotundo

Kurso “Leadership Skills” organisá pa Desert University tabata un èksito rotundo

 

Willemstad- Resientemente un kantidat di 25 Pastor i 58 Lider Kristian a gradua pa e kurso “Leadership Skills”. Dios a pone riba Pastornan Raimy i Arlette Juliet su kurason pa organisá un kurso den kua nan lo kompartí gratuitamente nan eksperensia i konosementu di e prinsipionan di Dios pa liderazgo. Durante 12 siman Pastor i Lidernan for di diferente kongregashon aki na Kòrsou a bini huntu pa interkambiá i siña mas for di loke Dios a impartá den Pastornan Raimy i Arlette Juliet su bida. 

 

E lèsnan simpel pero profundo aki, kaminda e palabra di Dios tabata sentral, a trata hopi aspekto importante di liderazgo general i prinsipalmente liderazgo den e reino di Dios. Tópikonan manera vishon, integridat, komunikashon, sirbimentu, planifikashon, maneho, atministrashon i efektividat den liderazgo ta entre e tópikonan ku a keda ámpliamente tratá. Tambe tabatin momentunan presioso den kua e Pastor i Lidernan a alabá Dios huntu i uni den orashon pa Kòrsou.

 

Kulminashon di e lèsnan aki tabata djasabra 19 di òktober, kaminda ku gran goso un kantidat di 83 Lider i Pastor a gradua. Esaki tabata un dia históriko pa Kòrsou. Tabata un bendishon tremendo pa mira e kurason di gratitut ku tur e Pastor i Lidernan aki tabatin pa tur loke nan a risibí durante e simannan tras di lomba. Hopi a duna testimonio di kon e prinsipionan saká for di e Palabra di Dios a trese un transformashon den nan bida pèrsonal, spiritual i tambe den nan kongregashon. 

 

E mainta bendishoná aki a konta tambe ku presensia di representante di Global University Señora Raji Murugesan ku a otorgá un plakat di rekonosementu ofisial na Pastornan Raimy i Arlette Juliet. E rekonosementu aki ta hasi ku Desert University ta internashonalmente rekonosé komo un sentro di estudio Kristian aki na Kòrsou. 

 

Nos ta gradisido na Dios pa tur lokual E ta hasiendo den bida di hopi i nos ta konvensí ku Dios lo sigui hasi kosnan grandi aki na Kòrsou.