Prome Minister Evelyn Wever-Croes: CUMBRE NACIONAL DI ENERGIA (ENERGY SUMMIT) “Lo traha hunto pa asina prome cu fin di aña Gobierno por presenta e vision di energia nobo na Parlamento y na comunidad”

Prome Minister Evelyn Wever-Croes:

 

CUMBRE NACIONAL DI ENERGIA (ENERGY SUMMIT)

“Lo traha hunto pa asina prome cu fin di aña Gobierno por presenta e vision di energia nobo na Parlamento y na comunidad”

 

Oranjestad — Diarason dia 23 di october 2019 a tuma luga e Energy Summit I riba vision y maneho di energia di Aruba. Na e cumbre aki a atende ambos e directivanan di e companianan di utilidad (Utilities, WEB & ELMAR), Refineria di Aruba, como tal gerencia di Departamento di Asuntonan Economico y Banco Central di Aruba y SDG Commission di Aruba.

 

Meta principal pa convoca e cumbre aki tabata pa discuti e metanan nobo di energia pa Aruba. Gobierno di Aruba, desde cu el a sinta, a cuminsa recalibra su vision di energia. Hopi lihe a resulta cu e vision pa Aruba bira 100% independiente di fossil fuels no tabata wordo carga pa tur stakeholders, y tampoco tabata realistico na e momento. 

 

Durante e prome cumbre aki Gobierno a pidi tur stakeholders pa alinea nan vision cu metanan cla, cu ta cumpli mas tanto posibel cu palabracionnan internacional, pero cu ta principalmente realistico y pagable pa e companianan, pa Gobierno y pa pueblo di Aruba. 

 

Cu esaki tambe Aruba lo ta den mesun liña cu e Metanan (Mundial) pa Desaroyo Sostenibel, e asina yama  “Sustainable Development Goals (SDG’s)” di Nacionnan Uni. Mas ainda, na e recien Assamblea General di Nacionnan Uni e topico di Cambio di Clima tabata na e top di e agenda. Un cantidad di pais a cometenan mes pa yuda combati cambio di clima door di reduci nan emisionnan. Aruba tambe tin intencion di bay comete su mes na metanan realistico.

 

Durante e cumbre, un di e observacionnan importatante tabata cu sector di energia ta importante, no solamente pa motibo di sostenibilidad, pero pasobra e ta afecta henter nos pais. Entre otro sector di energia ta impacta habilidad di nos hendenan pa por paga necesidadnan basico manera awa y coriente. Sector di energia ta afecta nos economia den su totalidad – e tin un impacto macro economico; riba inflacion, balansa di pago y reserva di devisas. Y sector di energia ta afecta nos medio ambiente y e tin impacto riba cambio di clima. Tur esaki lo tuma den consideracion pa desaroya e vision y maneho di energia nobo.

 

Prome Minister Evelyn Wever-Croes: “Finalmente a expresa cu e instancianan concerni lo traha hunto pa asina prome cu fin di aña Gobierno por presenta e vision di energia nobo na Parlamento y na comunidad. Pa yega na esaki tambe lo consulta cu stakeholders (gremio) externo”. 

This site uses Akismet to reduce spam. Learn how your comment data is processed.

error: Content is protected !!
%d bloggers like this: