Apertura di Luna di Edukashon Finansiero di CBCS
Apertura di Luna di Edukashon Finansiero di CBCS
Willemstad – E luna aki a marka komienso di e promé Luna di Edukashon Finansiero organisá
pa Centrale Bank van Curaçao en Sint Maarten (CBCS). Den kuadro di esaki, CBCS ta
kolaborando ku Fundashon Negoshi Pikiña (FNP) en bista di e ekspertisio, eksperensia i éksito
di e organisashon akí riba tereno di edukashon finansiero i lantamentu di empresa. E luna aki, e
meta ta pa papia mas ampliamente posibel riba tema relashoná ku finansa personal, ku atenshon
spesial pa outosufisiensia finansiero den komunidat. Tambe lo para ketu na e importansia di
CBCS pa nos sistema finansiero i pa komunidat en general.
Durante Luna di Edukashon Finansiero, di dia 1 te ku dia 30 di novèmber, lo organisá evento pa
alumno di skol di fundeshi i skol sekundario, studiante, empresario i públiko general. Den e
promé dos simanan, lo tene lèsnan interaktivo na diferente skol di fundeshi, presentá pa personal
di CBCS. Algun tópiko lo wòrdu tratá ta: (1) e evolushon di sèn (e.o. merkado di interkambio i e
importansha di sèn), (2) e funshon di sèn (modo di interkambio, spar, i konta), (3) e funshon di
CBCS (e.o. e diferensha entre un banko sentral i un banko komersial) i (4) sèn ta hasibu felis? E
charlanan aki ta forma parti di e proyekto mas amplio “Nos Komunidat” di FNP, den kual varios
empresario, empleado i mayornan di mucha ta duna charla.
Den e di tres siman di e luna aki CBCS ta sostené diferente aktividat den kuadro di Global
Entrepreneurship Week (GEW), pa motibu ku edukashon riba nivel empresarial tambe ta parti di
edukashon finansiero. Durante di e siman aki e skolnan di fundeshi ku a partisipá den e proyekto
“Nos Komunidat” ta risibí nan sertifikado di partisipashon. Nietu di e legendario Nelson
Mandela, señora Swati Mandela, tambe lo duna un diskurso inspirativo den e siman aki.
Den e último siman di novèmber alumnonan di skol sekundario i studiantenan di universidat lo
tene un debate. E ponensianan riba kual nan lo debatí lo tin di haber ku: (1) ekonomia, (2)
maneho empresarial i (3) edukashon finansiero. Aabes CBCS ta organisá un wèbinar ku
koperashon di University of Curacao (UoC) tokante di konosementu finansiero i maneho
empresarial. Durante di e wèbinar 3 studiante universitario lo presentá resultadonan di
investigashon, sigui pa un diskushon riba esaki ku otro studiantenan den region Karibense,
Latino Amerika i Europa.
Mediante e proyekto akí, CBCS ke hasi un kontribushon positivo na outosufisiensia finansiero i
komportashon finansieramente responsabel den komunidat di Kòrsou i di Sint Maarten.
Pa mas formashon tokante Luna di Edukashon Finansiero i otro aktividatnan organisá pa CBCS
den kuadro di edukashon finansiero, kontaktá CBCS libremente via e-mail na:
info@centralbank.cw.
CBCS ta invitá un i tur pa bishitá su wèpsait na https://www.centralbank.cw/education i su
página di Facebook ofisial pa keda na altura di tur evento organisá.
Willemstad, 13 di novèmber 2019
CENTRALE BANK VAN CURAÇAO EN SINT MAARTEN