Eksposishon úniko den kuadro di 50 aña archivo nashonal

Eksposishon úniko den kuadro di 50 aña archivo nashonal

Geplaatst op 13 Novèmber 2019 dor di Ministerio di Maneho di Gobernashon, Planifikashon i Servisio Públiko

Willemstad – Entrante 11 novèmber 2019 pueblo di Kòrsou por bishitá e eksposishon “Imágen di Pasado”. E eksposishon aki ta un di e aktividatnan den kuadro di e selebrashon di 50 aña Archivo Nashonal. Pa por presensiá e eksposishon aki, por akudí na nos monumento “Bolo di Batrei”, mihó konosí komo Archivo Nashonal situá na Scharlooweg 77.  E eksposishon lo ta aksesibel durante e orarionan di servisio di Archivo Nashonal kual ta djaluna mèrdia di 1:30or pa 4:30or i di djamars pa djabièrnè parti mainta di 8:00or pa 11:30or i parti atardi di 1:30or pa 4:30or.

Pa por realisá e eksposishon aki, a pidi 8 artista lokal i studiantenan di Instituto Buena Bista pa krea un obra di arte ku ta refleho di un suseso históriko di Kòrsou. E aspekto úniko di e eksposishon lo ta e kontraste entre e obranan figurativo di e 8 artistanan i e obranan mas apstrakto di e studiantenan. Dor di eksponé e obranan aki banda di otro, esaki lo krea un kombinashon interesante i emoshonante pa loke ta trata nos historia- i arte lokal. Den un palabra, “Imágen di Pasado” ta bale la pena pa tantu esnan interesá den nos historia nashonal komo esnan ku gusta arte.

Un danki speshal ta bai na Stichting Vrienden van het Nationaal Archief, Kas di Kultura, Instituto Buena Bista, Vertegenwoordiging van Nederland in Willemstad i “Prins Bernhard Cultuurfonds Caribisch Gebied”. Paso nan kontribushon a hasi e eksposishon aki posibel.

 

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: