Futuro di Refineria Isla, empleadonan di e refineria, di kontratista i perspektiva pa un operador nobo pa e refineria

Willemstad, 18 di novèmber 2019

                                                                                                   

Na: Vise Presidente di Parlamento
Señor E. Cleopa
Wilhelminaplein 4
Presente

Tópiko: Petishon pa reunion públiko di Parlamento ku karakter di urgensia ku e punto di agènda, Futuro di Refineria Isla, empleadonan di e refineria, di kontratista i perspektiva pa un operador nobo pa e refineria

 

Señor Presidente,

 

Suskritonan, miembronan di e frakshon di MFK den Parlamento, ta aserka bo persona ku e petishon konforme artíkulo 64 insiso 4 di Reglamento di Órden ku ta bisa “De  leden worden schriftelijk tot de vergadering opgeroepen. De oproepingsbriefjes worden, spoedeisende gevallen uitgezonderd, tenminste 4 x 24 uur voor het houden van de vergadering aan de leden verstuurd. Ze vermelden zoveel mogelijk de zaken waarover de vergadering belegd is. Tegelijk met deze oproeping worden dag, uur en agenda ter openbare kennis gebracht”, pa tene un reunion públiko urgente di parlamento ku e punto di agènda ariba menshoná. 

 

Señor Presidente despues di a skucha representashon sindikal di kontratistanan i despues di e bishita realisá na Refineria Isla, kombersashon ku gerensia i empleadonan di e refineria, frakshon di MFK ta kere ku ta momento pa gobiernu pone tur karta riba mesa.

 

Empleadonan di refineria i di kontratistanan ta den insertidumbre pa ku futuro di nan i di nan famia i gobiernu di Kòrsou no ta informá ni Parlamento, ni e empleadonan di forma serio kiko ta bai pasa ku refineria despues di 31 di desèmber próksimo.

 

Empleadonan a ekspresá na nos frakshon ku e areglo ku nan sindikatonan a sera ku gerensia di PDVSA, no ta mas importante ku garantia di nan trabou i pa nan futuro.  

 

Ta falta apénas 43 dia pa e kontrakt ku PDVSA vense i no ta konosí ku e kompania ku kual ta negoshando, lo kontinuá ku e operashon pa 1 di yanüari 2020 i tampoko ku e personal lo pasa over pa laborá pa e operador nobo.

 

E lokual nos a relatá aki señor Presidente ta konstituí sufisiente motivashon pa konvoká un reunion públiko di Parlamento ku e punto di agènda ariba menshoná, kual reunion Parlamento lo bai fiha su posishon i nos ta konta ku e reunion públiko urgente aki lo keda tené den e tempu, ku konforme Reglamento di Ordu ta preskribí. Frakshon di MFK ta pidi bo pa invitá Minister presidente Eugene Rhuggenaath pa ta presente. 

 

Atentamente,

 

___________             _____________  _______________  

Gilbert Doran – Charles Cooper –  Jacinta Constancia

 

This site uses Akismet to reduce spam. Learn how your comment data is processed.

%d bloggers like this: