Mantenshon i limpiesa di Dam i Roi den diferente bario ta laga di deseá i ta trese hopi molèster pa abitantenan

Na Minister di Tráfiko, Transporte i Planifikashon Urbano

Señora Zita Jesus-Leito

PRESENTE

 

Willemstad, 20 di novèmber 2019

Tópiko: Mantenshon i limpiesa di Dam i Roi den diferente bario ta laga di deseá i ta trese hopi molèster pa abitantenan

 

Honorabel  Señora Minister Jesus-Leito,                                                                                                                 

 

Frakshon di MFK a wòrdu aserka pa diferente abitante relashoná ku limpiesa di Dam i Roi den diferente bario na Kòrsou. Abitantenan ta aserka servisionan di gobiernu ku ta kai bou di responsabilidat di señora Minister pa pidi pa laga limpia Dam i Roi, pero nan no ta haña e satisfakshon nesesario, pero e limpiesa tampoko no ta tuma lugá.

 

Debí ku e dam i roinan no ta wòrdu mantené i limpia ta trese hopi problema pa e abitantenan. E dam i roi nan ta yen di sushi, awa ta keda para den esakinan i ta krea un situashon a-higiéniko i tambe ku posibilidat di malesa di sanguranan ku por pèrkurá pa malesa serka e abitantenan.

 

Hopi di e dam i roi nan aki mata i yerba a krese den nan di tal forma ku praktikamente bo no ta mira nan mes mas i ta tapa bista di e abitantenan for di nan kas, esaki ta krea un situashon di inseguridat serka e abitantenan.

 

Tin barionan spesífiko manera Montaña Abou i Rooi Santu ku mester di atenshon urgente pa limpiesa di e Dam i Roi nan aki. Pero ta hopi bario mas rònt Kòrsou ta sumamente preokupá pa ku e situashon di mantenshon di nos Dam i roi nan.

 

Hasiendo uso di artíkulo 96 di Reglamentu di Orden nos ta hasi minister Jesus-Leito e siguiente preguntanan:

 

  1. Minister por informá Parlamento si tin un plan/skema di mantenshon pa ku Dam i Roi nan rònt Kòrsou?

 

  1. Si kontesta na pregunta 1 ta afirmativo, Minister por manda e plan/skema  di mantenshon aki pa Parlamento i tambe informá si a ehekutá esaki durante aña 2019?

 

  1. Kuantu sèn tabatin presupuestá pa mantenshon di Dam i Roi nan pa aña 2019 i kuantu ti presupuestá pa aña 2020?

 

  1. Minister ta konosí ku e situashon di Montaña Abou (Kaya Othaheito) i Rooi Santu (Kaminda Rooi Santu ku skina di Kaya Navigator), mira fotonan athunto. Ta posibel pa Minister duna prioridat na e dos sitionan aki?

 

Suskrito Parlamentario Gilbert Doran di frakshon di MFK ta spera ku minister Jesus-Leito tuma bon nota di e kontenido di e karta aki i kontestá nos preguntanan den e tempu stipulá konforme palabrashonnan entre Parlamento i Gobièrnu di Kòrsou.

 

Atentamente,

 

_______________

Gilbert Doran

Parlamentario pa

Frakshon di MFK

 

Na: Vise-Presidente di Parlamento di Kòrsou

Señor E. Cleopa

Wilhelminaplein # 4

PRESENTE

 

Kòrsou, 22 di novèmber 2019

 

Apresiabel Señor Cleopa, 

 

Pa medio di e karta aki, hasiendo uso di artíkulo 96 di reglamentu di órden 

di Parlamento, mi ke pidi bo persona pa dirigí e karta athunto na Minister Zita Jesus-Leito ku preguntanan ku frakshon di MFK ta hasi na e minister konserní.

 

Danki pa e koperashon.

 

Atentamente,

 

_______________

Gilbert Doran

Parlamentario pa

Frakshon di MFK

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: