Partido PAR: minister di OWCS, Steven Croes, a huramentá

 

Partido PAR: minister di OWCS, Steven Croes, a huramentá

 

Willemstad – Despues di a kana e proseso kompleto di ‘screening’, Minister di Asuntunan General, Promé Minister, señor Eugene Rhuggenaath, a hasi e trámitenan nesesario pa e nombramentu awe 30 di novèmber 2020, di señor Steven Croes, komo Minister di Enseñansa, Siensia, Kultura i Deporte. 

Dia 26 di novèmber último den un reunion virtual di ‘partijraad’ a informá e miembresia i direktiva a pidi miembresia pa akordá esaki. Miembronan a yama señor Croes bon bini a a dese’é tur kos bon. Tambe a konsehá señor Croes pa pone atenshon agudo na e diferente aspektonan den e kartera aki ku ta di sumo importansia.  

Minister Steven Croes, ku ta bini di e sektor finansiero, ta kere fiel den siña mucha- i hóbennan diferente abilidatnan na un edat yòn. Por ehèmpel, presupuestashon. Ta un abilidat ku ta hopi importante den nan desaroyo komo futuro adulto, pa por atendé na un manera responsabel ku sèn. Minister Croes sa ku e kartera tin hopi reto. E a prepará su mes pa por duna esakinan tur e atenshon nesesario i ehekutá tur loke ta na interes di Kòrsou kompletu. 

 

Steven John Croes ta nase na Kòrsou. E ta un èks alumno di Radulphus College. Despues di kaba su HAVO, Steven a sigui e estudio International School of Economics na Rotterdam. Tambe e a finalisá dos estudio di Leadership Academies, tantu na Amsterdam komo na Bogota. 

Steven tin hopi eksperensia den e ramo finansiero. Durante último añanan e a fungi den diferente posishon di liderazgo na vários kompania di renombre manera Citco Funds Services na Amsterdam, HB Management Intertrust i te ku resien na Citco Banking Corporation aki na Kòrsou. 

Steven tin un afinidat pa polítika. Na aña 2019 e a bira miembro di partido PAR den kua e ta miembro di diferente komishon. Resien e a ser eligí komo miembro di e direktiva nobo di PAR.

 

Malvina Cecilia

Sekretario 

Partido Alternativa Real