Akshon pa rekoudá ’11k pa investigashon na Bahia di Lac’

Akshon pa rekoudá ’11k pa investigashon na Bahia di Lac’

Sea Turtle Conservation Bonaire (STCB) ta komprometé pa protehá turtuga di laman rònt Boneiru. Un di e estudionan ku STCB ta implementá ta e investigashon di ‘kapturá-marka-rekapturá’ (‘catch-mark-recapture’). E investigashon akí ta analisá spit di kresementu, distribushon di poblashon i salubridat di turtuga di laman rònt Boneiru.

Lac Bay, ku tur su yerba di laman, ta e área mas prinsipal di nutrishon pa turtuga blanku na Boneiru. Investigashon di STCB durante e último binti aña ta mustra ku turtuga di laman na Bahia di Lac ta krese signifikantemente mas rápido ku turtuga di laman ku ta biba na kosta wèst di Boneiru. E spit di kresementu mas rápido ta resultá den turtuga ku ta madurá mas tempran i asina tambe por pone webu mas tempran.

Aktualmente nos ta mira un bahada leve den e spit di kresementu den Bahia di Lac. Esaki por ta debi na diferente faktor manera yerba di laman, mal kalidat di awa, malesa of posiblemente otro faktor ku ainda nos no a deskubrí. Pa por sigui kolektá dato, pa asina nos por sigui monitor e situashon na e bahia i siña di e posibel otro faktornan ku ta influensiá e spit di kresementu, nos mester di material. E nèt ku aktualmente ta usa pa e investigashon di ‘kapturá-marka-rekapturá’ ta asina gastá despues di 20 aña i a bira tempu pa bai remplasá esaki.

Pa e motibu akí, STCB a start un kampaña pa rekoudá fondo i e tim di riba tereno – koordinadó di tereno Daan i stazjèr Kate – lo bai landa na fin di yüli un ròndu (di total 11 km) rònt Klein Bonaire – un otro área importante pa nutrishon – pa rekoudá 11.000 dòler pa dos nèt di investigashon nobo. Daan i Kate, kendenan ámbos no tin eksperensia ku landamentu di distansia largu, ta determiná pa landa e ròndu den un dia. Nan a kuminsá ku entrenamentu na komienso di yüni pa e 11 kilometernan di e ròndu ku pa awor ta planeá pa tuma lugá den e siman di 29 di yüli. Bo por sostené nos dor di hasi un donashon na Sea Turtle Conservation Bonaire. Bo donashon lo bai pa uso di kompra di dos nèt di investigashon nobo pa kontinuá ku e investigashon na Bahia di Lac.

Por entregá donashon via nos kuenta di banko lokal na MCB # 101169209 òf via nos kuenta di Hulanda na Rabobank # NL71 RABO 0313 2425 26. Pa mas informashon por yama na (+599) 717 2225 òf manda un mail pa cepa@bonaireturtles.org.