30 di novèmber a marka final di temporada di orkan 2019 

30 di novèmber a marka final di temporada di orkan 2019 

 

Willemstad – 30 di novèmber a marka final di temporada di orkan 2019. Servisio Meteorológiko Kòrsou ta duna un bista di e temporada aki. Un komparashon a wòrdu hasi pa Colorado State University riba loke a pronostiká i lokual ku enbèrdat a tuma lugá. 

 

Colorado State University ta wak bèk riba un pronóstiko ku nan a emití dia 5 di ougùstùs 2019. Esaki tabata e último pronóstiko ku nan a emití pa e temporada di orkan aki. Den esaki, nan a pronostiká un kantidat di 14 sistema ku lo por haña un nòmber. Esakinan lo por a desaroyo i bira un tormenta. Na final di e temporada por bisa ku un kantidat di 18 sistema a desaroyá i haña nòmber. 

 

For di e 14 tormenta tropikal pronostiká, 7 di nan lo por a bira un orkan. En realidat, e kantidat di sistemanan ku a bira un orkan tabata 6. Tambe a pronostiká 14 tormenta tropikal di kual 2 lo por a sigui desaroyá i bira un ‘major hurricane’, esta un orkan kategoria 3 òf mas haltu. En realidat tabata tin 3 ‘major hurricane’ durante di e temporada aki. Konklushon di esaki ta ku e aña aki tabata un poko mas aktivo ku lokual tabata e pronóstiko. 

 

Por a konkluí esaki pa motibu ku a bai for di un kondishon konosí komo ‘El niño’, i hasi un transishon pa un kondishon neutral. Pues ‘El niño’ no tabata dje fuerte. Esaki a pone ku nos tabata tin un temporada bastante aktivo den e luna pik di temporada di orkan, esta sèptèmber. E superfisie di laman, pa loke ta e parti di oséano atlántiko, tabata un tiki mas kalor ku normal. Esaki a duna e sistemanan energia pa nan por a desaroyá i bira siklon tropikal durante e lunanan di sèptèmber i òktober. 

 

E orkan ku niun hende lo lubidá ta Dorian. Dorian ta e promé orkan di kategoria 5 ku a asotá e islanan di Bahamas. Esaki tabata esun ku a sòru pa mas tantu desaster durante e temporada di orkan 2019, segun Colorado State University. 

 

Un gran mayoria di e sistemanan a desaroyá riba oséano atlántiko for di kosta di Afrika i a keda riba oséano atlántiko. Nan a move nort di Sint Maarten i Puerto Rico. Niun no a drenta laman Karibe òf a forma un menasa pa Kòrsou durante e temporada aki. Sin embargo, Meteo a emití vários alerta i prekoushon pa kalor eksesivo durante luna di ougùstùs i sèptèmber. Esaki tabata debí na e sistemanan ku a desaroyá i pasa pafó di e área di Karibe i a influensia Kòrsou su situashon di bientu. 

 

Meteo a sigui kada un di e sistemanan aki. Na momentu ku esaki tabata di interes, Meteo tabata hasi menshon di kada un di e sistemanan aki den e pronóstiko diario. Tambe riba e página di facebook di Meteo por haña desaroyo di kada un di e sistemanan aki bèk. Di e forma, aki por a mantené pueblo di Kòrsou debidamente informá. 

 

Meteo ta wak bek riba un temporada di orkan trankil pa nos na Kòrsou. Tabata tin vários ola tropikal ku a krusa riba nos isla. Pero esakinan a krusa sin muchu áwaseru signifikante. Pa e motibu ei, e temporada aki tabata muchu mas seku ku normal mirando e kantidat di áwaseru ku nos sa haña.