‘Ku Pashon’; un videoclip di Viva Kids pa e temporada festivo aki kargá ku un mensahe positivo pa Kòrsou
‘Ku Pashon’; un videoclip di Viva Kids pa e temporada festivo aki kargá ku un mensahe positivo pa Kòrsou
WILLEMSTAD- Ku hopi orguyo VivaKids Recycleband awe a hasi lansamentu ofisial di e videoclip di nan kansion pa e temporada di fiesta aki, ‘Ku Pashon’. ‘Ku Pashon’ ta karga un mensahe profundo di perseveransia i speransa di adelanto pa Kòrsou kual ta sali for di kurason di kada integrantenan i lidernan di Viva Kids.
‘Ku Pashon’ ta un gaita kompositá i areglá pa e artista multitalentoso, Omar Sling. E mensahe prinsipal tras di e kantika aki ta, pa motivá i empoderá kada Yu di Kòrsou pa nos ban traha huntu pa asina logra adelanto di nos pais. Kòrsou tin tur e potensial pa logra kosnan eksepshonal apesar di kon tiki nos tin kisas na nos alkanse. Loke nos mester hasi ta djis uni mas i dirigí tur nanishinan den e mesun direkshon.
E banda Viva Kids ta un ehèmpel puru di esaki, ku bleki, sobrá di fèn i otro artefaktonan desechabel, e muchanan aki kada bes di nobo a bin ta logra trese dushi músika ku a sa di move grandi i chikí.
Di mes manera nos tambe por uni i harmonisá nos abilidat i talentonan pa asina logra lo máksimo pa Kòrsou. Si kada un di nos duna tur loke nos tin i hasi e loke nos por ku pashon, Kòrsou lo logra sigur.
Nos di Viva Kids ta konvensí ku Kòrsou tin tur e hèrmèntnan nesesario, falta awor pa nos pone esakinan na obra. Deseonan di Viva Kids Recycleband ta, pa e union i koperashon aki no keda solamente den e temporada di fiesta aki so, sino kada dia di nobo durante e dia i añanan benidero.
Ku e kansion aki, Viva Kids ta ekstendé deseonan di un dushi temporada di fiesta na henter Pueblo di Kòrsou i mas ku klaro nos gradisimentu di kurason pa a karga ku i kere den e grupo durante aña 2019. Deseonan pa kada hogar keda yená amor, union i pas i ku nos por drenta un aña nobo huntu yen di kreatividat i kresementu.
Mas ku klaro Viva Kids lo no ke laga e oportunidat aki pasa sin gradisí i mustra nos mas sinsero apresio na Aqualectra i kada persona ku a hasi e videoclip aki posibel; tantu finansieramente komo dor di a kontribuí ku nan talento di un òf otro forma.
Nos meta ta, pa sigui desaroyá, kontribuí i invertí den e muchanan aki durante 2020 tambe, ya asina mañan nan por ta bon ekipá. Pues si bo tambe ta kere ku bo por aportá na kresementu di e simianan aki i bo ke bira un Amigu di Viva laga nos sa na 511-8202 òf 692-9533 i nos lo splika bo kon bo tambe por bira un amigu di VivaKids.
Un i tur por disfrutá di e videoclip nobo “Ku Pashon” tantu riba Youtube komo riba Facebook di VivaKids Recycleband. Like e videoclip i komparti esaki i mas ku klaro laga bo komentario atras. Tambe por pidi e kansion na tur radio emisora lokal i asina sigui kompartí e mensahe positivo aki ku tur hende rondó di nos..
